Shillong, Jymmang 11: Baroh san tylli ki klob ialehkai bna nam jong ka nongbah Shillong ba kynthup ia ka klob kababat ruh ia ka nam kum ka lahduh ka Mawlai SC, Shillong Lajong FC, Nongkseh SSCC, Nangkiew Irat SC bad Rangdajied United FC, ki la lah ba kin khur ia la ki nam jop ki jong ki ha ka Round of 16 jong ka lympung ialehkai ka 5th Meghalaya State League, ka MFA, ba la long mynta ka sngi.
Nalor kitei ki kynhun ialehkai, sa artylli ki klob ba la lah lem ban jam shakhmat ha kane ka lympung ialehkai ki long Maram FC bad ka bad Rymbai Shkenshynriah.
Katba ka jingiakhun ha Mairang ba la dei ban iakhun hapdeng ka Langsning FC pyrshah ia ka Lumphyrnai Sohphoh FC, la hap ban pynsangeh namar ka jingbym ailad jong ka suin bneng bad ia kane ka jingiakhun yn kynriah noh pat ia ka sha madan ialehkai jong ka Shillong’s SSA Stadium bad ba kan long lashai ka sngi ha ka por 6:45 janmiet.
Ki resol na ka jingiakhun ba la long mynta ka sngi, ha kaba ka Nangkiew Irat ka la hap ba kan ieng iakhun tyngeh ban pynliem ia ka Khimusniang SC da 2-1.
Katba ha ka jingiakhun ba la long ha Amlarem, ka Mawlai SC ka la pynpaw ia ka sur ialehkai kaba khlain palat liam ka jong ka tad haduh ba kan da lah ba kan pynliem ia ka Thangskai Tiger SC da 11-0.
Ki rang ialehkai ka Mawlai ba la ioh ban thep ia kine ki kol ki long Robertson Khongriah (13′, 18′, 32′) , Wadshwa Latoo (56′, 81′) , Jestibor Mawlong (83′, 88′), Samlang Rympei (28′), Fairming Suting (45’+1), Kevin Rymbai (57′) bad u Basuklang Bina (59′).
Ha kane ka kynti jongka jingiakhun, ka Mawlai SC ka la wanphai pura biang kum ka kynhun, hadien ba ki rang ialehkai kiba pura ki jong ka, ki la wanphai noh sha la iing hadien ba ki la dep ban iashim bynta ha ka lympung jong ka their I-League 3 ba la long ha Manipur.
Ha kawei pat ka jingiakhun, ka kynhun ialehkai jong ka Shkenshynriah ka la lah ba kan pynliem noh iaka Amlarem SC da 2-0 bad ia kine ki kol la thep ia ki da u Hesmiki Rymbai (7′, 26′).
Katba ka lahduh jong kane ka lympung ha u snem 2023 ka Rangdajied United FC ba kan sei lut ka buit ka bor ka jong ka ban lah ban pynliem ia ka Janepih YSCA da 3-1.
Kane ka jingiakhun ka dei kaba la pynlong ia ka ha Williamnagar bad ba la wan ban sakhi da u paidbah byllein, kaba u da hun shisha jrut ban ioh ban peit bad sakhi ia kane ka jingiakhun kaba iakhaid bad kaba da ia biang bor, namar tad haduh ba kut ka por ba la buh ki ar kynhun ba kin iakhaid shwa, bad hadien kane, la rah pat ia ka sha ka extra time, kaba hangne ka Rangdajied ka la bteng ba kan ioh pat ba kan thep ia ki kol ba sah ki jong ka bad khur syndon ia ka nam jop.
Katba ka lahduh u snem 2019, ka Shillong Lajong FC ki la lah ba kin pynliem da 5-0 ia ka Mishon SSCC, ha ka jingiakhun ba la long ha Wahiajer, bad nam tam ha kane ka jingiakhun ki long u Fridison Wanniang (57′, 81′, 86′) bad Deibormame Tongper (45’+2) katba sa shi kol ka dei ka own goal.
Ha ka jingiakhun ha Mawkyrwat ka Maram FC ka la lah ba kan pynliem da 1-0 ia ka Seng Samla Umdang Pyllun ba dia kane ka shi kol la thep ia ka ha ka minit ba 68 da u Tremarchwal Ch Marak.
Ka jingiakhun ba khatduh jong ka sngi ka dei ka jingiakhun hapdeng ka Nongkseh SSCC kaba la lah ba kan pynliem ia ka Mawphu da 4-0m bad ia kine ki kol la thep ia ki da Hardy Cliff Nongbri (36′, 66′), Shano Tariang (45’+8) bad u Chesterpaul Lyngdoh (64′).
