Nongpoh, Iaiong 06: Ka Ri-Bhoi Youth Federation (RBYF), Umsning Circle, ka la pynpaw ia ka jingbynñiaw halor ka jingleh bakla bad leh thulmur khlem nongrim jong officer in charge jong ka Umsning Police Out post, ha kaba u la pynngat ha ki kyndon aiñ ba eh bha pyrshah ia u president barim ka RBYF, Umsning Circle, u Bah Phrangsngi Kylla.
Ki kyndon aiñ ba la pynngat ia u tei u nongialam ka RBYF ki long ha ka kyndon ain 384/511/506 IPC, kiba katkum kitei ki kyndon aiñ, ki kdew ba utei u nongialam u ngat ha ka jingshah set phatok ba shi jingim (life imprisonment), la kynnoh u president ba mynta ka Umsning Circle, u Samla J.J Lapang.
Haba iakren ha ki lad pathai khubor, u Samla Lapang ha ryngkat ka jingdon lang kiwei ki nongialam ka seng, ki la kynnoh ba utei u OC u la kynnoh ba u Bah Kylla u la donkti ha ki kam dawa pisa, ha kaba katei ka jingkynnoh kam long satia kaba shisha bad ki la ong ruh ba ha ka jingshisha u Bah Kylla u la leit ban kylli na uwei u briew ia uba la tip kyrteng kum u Sabratta Dutt shaphang ka pisa na ka bynta ka jingsynñiang sha ka Joint Christmas Carol ha ki bnai tlang, kaba ia katei ka Joint Christmas Carol la pynlong da ki seng bhalang ba kynthup ia ka RBYF, KSU, FKJGP, CORP, Seng Samla Shnong bad ki Balang bapher bapher jong ka thaiñ Umsning.
Pynban ki la ong ba utei u Sabratta u la ujor da ka ejehar (FIR) pyrshah ia utei u nongialam ha Umsning Out post ha ka 25 tarik Kyllalyngkot, 2014, kaba kum u nongialam um shym la dawa pisa hynrei tang ka jingkynjoh ktien shaphang katei ka synñiang ba la iakut, kaba la pynlong pat ia utei u incharge katei ka Out Post ban phah beit ia kane ka kam sha ka Court khlem da wad bniah halor kane.
Hadien lai sngi kata ha ka 30 tarik Kyllalyngkot, utei u Sabratta u la leit ban weng noh ia katei ka jingujor, hynrei na ka liang utei u incharge um shym la patiaw satia, la kynnoh shuh shuh kitei ki nongialam ka RBYF.
Ha kaba iadei bad kane, na ka liang ka RBYF ka pynrem jur ia utei u incharge katei ka Out Post, uba da ka jingleh jong u kumne, ka long kum ka jingpynduh mynsiem ia ki samla ka thaiñ ban trei na ka bynta ka bha ka miat ha ka imlang sahlang, nalor ba utei u Bah Phrangsngi ym tang ba u long uwei na ki nongialam ha ka seng, hynrei u long ruh u Rangbah Shnong ha Syadrit ki la ong.
Hynrei utei u nongialam um shym la don kano kano ka jingbyrngem pyrshah ia utei u briew uba la ujor, ki la ong bad kaba sngewlyngngoh ka long ba tang na katei ka daw ba u leit kylli halor katei ka synñiang u la shah pynngat syndon ha kitei ki kyndon aiñ ba eh kaba dei ka aiñ ban shong patok shi jingim, kaba kum ka seng kam lah satia ban pdiang, namar ka long kumba rai pyrshah ia u nongkam sniew ba shyrkhei ha ka imlang sahlang.
Kumta na ka liang ka seng ka la ong ba kam kwah ba kum kine ki jait ophisar kin wan shakri ha kane ka district da kaba ong ruh ba ‘wat pynlong ia ka Umsning kum ka ktem jong ki riewkhlaw da kaba pynngat ia ki samla ha ki kyndon aiñ ba shyrkhei khlem da wad shuwa ia ki jingshisha.’
Ki la ong ruh ba kum kine ki ophisar na ka liang ki bor sorkar ki la dei ban phah noh ia ki sha ki jaka ba bun kaikhlaw ne sha Rilum Garo, ban iakhun pyrshah ia ki kaikhlaw kiba don ha kitei ki jaka.
U Bah Phrangsngi u la ioh ia ka jamin ha ka 2 tarik Ïaïong, 2014, na ka ka iing bisahr ha Nongpoh Ri Bhoi District .(SP News)
