Shillong, Jylliew 12: Ka Hynniewtrep Youths’ Council (HYC) Dangar Balat Border circle ha ka 9tarik mynta u bnai ka la hiar ban jurip ia ka jingtwa khyndew kaba la pynjulor shikatdei eh ia ka iing jong I Kong Skwollin Kharlyngdoh ha Nongthymmai Raidewsaw.
Katei ka jingjia ka la jia ha ka miet jong ka 8 tarik mynta u bnai ha kaba baroh shi iing ki la shu lait thaw na ka jingjia ba sngewsih lyngba ka jingker jingda jong u Nongbuh Nongthaw. Katkum ka khubor ba ka seng ka la lum jingtip na ki trai iing, katei ka jingshah pynjulor ha katei ka jingtwa khyndew ka la kot da ki lak tyngka.
Kumta ka seng ka kyrpad ia ki bor ba dei khmih naduh ka ophis u BDO Ranikor C & RD Block ki Nongmihkhmat kum u MDC bad u MLA jong ka thain ba phin sngewbha ban phai khmat lem sha katei ka long iing ba kan ioh ka Jingiarap kaba kham kloi, khnang ban kin lait na u slap ka lyer ha kum kine ka aiom, kane ka long katkum ka kyrwoh kaba la phah da u samla B S Sanglein nongkit kam ka seng HYC.
