Shillong, Naitung 16: Ka ain, The Khasi Hills Autonomous District (Appointment and Succession of Chiefs and Headmen) Act 1959 ka long pyrshah ia ki nongrim u Syiem Tirot Sing Syiemlieh bad pyrshah ia ki nongrim jong u Kiang Nongbah
Ban im ki nongrim u Syiem Tirot Sing Syiemlieh, Syiem Hima Nongkhlaw – Ki MDC Khasi & Jaintia ADC ki dei ban pynshai bad batai paidbah ha la ki MDC Constituency hakhmat Ki Syiem, Sirdar, Lyngdoh, Wahadar, Dorbar Kur, Seng Kur khamtam ki kur kiba jied bad sei ia ki bakhraw batri hapoh ka Bri Hynniewtrep ia ka jingthmu jong ka ain The Khasi Hills Autonomous District (Appointment and Succession of Chiefs and Headmen) Act 1959
Ha ka 17 July 2014, yn rakhe ia ka jingdap 179 snem ka sngi iap u Syiem Tirot Sing Syiemlieh, Hima Nongkhlaw State.
Ha ki por ba ka jingtynjuh ka long kaba shyrkhei bad ha kaba ki sbai pyrthei bun sien ki pynmatlah ia ki paidbah bad khamtam ia kiba bun ki nongmihkhmat.
Ha ka juk ka por ha kaba ki wan ki ain kiba ngim sngewthuh namar ngi shah pynngop ha kiba theh ia u sbai uba shipor uba lah ban pynduh noh syndon ia ki hok tynrai jong ngi. Kyndit ko samla shwa ban dier ka por. Ia husiar ia ki suri kup snieh langbrot iai im sngi ban ieng ha ka nongrim ki Riti Dustur jong ngi ia kaba ka history ka ong ba u Syiem Tirot Sing Syiemlieh, uba la ieng ban ialeh ban pynneh ia ka jinglaitluid jong ka synshar u khasi, kaba mut ka jinglaitluid jong ki Dorbar Kur, ki Seng Kur, Dorbar Shnong, Dorbar Raid bad Dorbar Hima ha kine ki lum ba thiang jong ngi.
Ha kane ka sngi iap kaba 179 snem u Syiem Tirot Sing Syiemlieh, ngi kyrmen ba ka bri u Hynniewtrep kan pynmih ia ki Khlieh Nongsynshar kum ki Syiem, Lyngdoh, Basan, Bangthai, Lyngskor, Myntri, Sirdar, Wahadadar, Sordar, Rangbah Shnong, Doloi, bad kiwei kiwei ki Nongsynshar naduh Shnong, Raid haduh Hima kiban im sngi ha ka nongrim jong u Syiem Tirot Sing Syiemlieh.
Ha kine ki sngi ngi iohi ia ki jingleh donbor na ki bor synshar KHADC ym da ka thma hynrei da ki ain na Khasi Hills Autonomous District Council, kat haduh ba ki ong ba la knieh noh ia ka bor laitluid jong ki Seng kur, Dorbar Kur, ki Dorbar Shnong, Raid bad Dorbar Hima, ban phah bad ban jied ia ki nongmihkhmat sha ka synshar khadar (partyless political institution) u Khasi bad khnang ban iashai u Khun u Hajar hapoh ka bri hynniewtrep, bad khnang ba ka jingleh burom ia u Syiem Tirot Sing Syiemlieh, Syiem Hima Nongkhlaw, kan long kaba don burom bad kaba don nongrim, bad khnang ba ka jingaiti bad ki nongrim jong u Syiem Tirot, kin long kiba im ia ngi ki longdien, ngi kyntu jur ia ki Member District Council (MDC) jong ka Khasi bad Jaintia Hills Autonomous District Council ba kin pynkylla khasi bad pynshai bad batai ha la ki MDC Constituency hakhmat Ki Syiem, Sirdar, Lyngdoh, Wahadadar, Dorbar Kur, Seng Kur khamtam ki kur kiba jied bad sei ia ki bakhraw batri hapoh ka Bri Hynniewtrep ia ka jingthmu jong ka Ain The Khasi Hills Autonomous District (Appointment and Succession of Chiefs and Headmen) Act 1959, bad ngi kloi ban leit pynshai ia kino kino ki Kur kiba kwah jingshai ha kaba iadei bad katei ka ain kaba la pynhiar dor ia ka bri hynniewtrep, hakhmat ki bor synshar nongwei.
Haba la don la ki jong ki MDC, ki MLA, bad ki MP, ngi la ioh ia ka jinglaitluid na ki phareng, hynrei kawei ka jingkylli ka long balei ba ngi dang shah teh mraw ha katei ka ain The Khasi Hills Autonomous District (Appointment and Succession of Chiefs and Headmen) Act 1959, kaei ka daw ba ngi dang shong syier kat sha ba ngi phai, naduh u pud u sam, ne ka synshar khadar. Ngi la pdiang ia ki jingsynshar bapher bapher hynrei ngi iohi kumno ba ngi ia kynduh jingeh haba ia tyngkhuh hapdeng ki Ain (party) bad ki Riti ki Dustur (khlem party)bad ba bunsien ki madan ki hok jong u khun u hajar namar shah lynshop da ki ain kiba mih na ka synshar (party) kaba la pynlong ia ki khun ki hajar ban im ha ka jing shong syier, bun sien ka long ka ba lehrain ba ki Dorbar, ki Seng Kur ki Khun ki hajar, ki Hima/Elaka ki hap leit wad ia ki Hok na ki iing kashari High Court bad la don ki khep ba ki la hap ban leit shaduh Supreme Court.
La ia leh thma man ka sngi bad ki ain bapher bapher. Ngi kyntu jur ia ki MDC, MLA, MP, ki khun ki Hajar, ki samla, ki longkmie, ki Dorbar Kur, ki Seng Kur ki Nongsynshar naduh Shnong haduh Raid bad Hima, ban long kiba peitngor ban long kiba im sngi ban long kiba smat ban wad ban pule bad ban tip shaphang ka Riti Dustur, ka history ka jaidbynriew lajong, ban ieng ha ka nongrim jong ki dulir kat kum ki jingkular ha ka jutang ka jingiasoh bad ka jingiateh kular” (Instrument of Accession and Annexed Agreement – IOA & AA) kaba la soi ha u 15 Dec 1947 bad pdiang da ka Sorkar India ha u 17 August 1948
Ka don ka jingkyrmen namar ki khun ki hajar haduh kine ki sngi ki iai angnud ba ka Sorkar India kan pyndep ia la ki jong ki jingkular, bad ba ki dulir jong ki arphew san (25) Hima Khasi States lane kiba la tip kum ka Federation of Khasi State ha kine ki snem ki la poi sha ka miej jong u President ka Ri India, ki miej u Prime Minister bad Home Minister, kynthup sha ka miej jong ka National Commission for Scheduled Tribes, ka miej jong ka National Commission for Human Rights, ka Sorkar India, kaba sah ka long ban ioh ia ki nongialam kiba shemphang kiba don ka jingsngewthuh ia ki Riti ki Dustur halor kine ki dulir dupat, khnang ban pynlong Ain da kaba pynrung ia kitei ki jingiateh hapoh ka Riti Synshar ka Ri India, ban iada ia ka Ri Khasi Jaintia bad ia ka Jaidbynriew.
Ha kum kane ka sngi ngi ai khublei ia u Paiem Phrester Manik Syiemlieh, Syiem Hima Nongkhlaw bad ka Dorbar, ka Synjuk ki Sordar Shnong kiba la khot sngewbha ia ngi sha ka lyngkhuh snem 179 ka sngi iap u Syiem Tirot Sing Syiemlieh, Syiem Hima Nongkhlaw.(SP News)
