Shillong, Naitung 25: U bah Ernest Mawrie State President jong ka party BJP ha Meghalaya u la pynrem jur ia ka jingjia ha Tura ban kawang maw ha ka jaka ba pynlogn jingialang u myntri rangbah ka jylla.
La ong ba ka party BJP ka khlem ai kano kano ka jingmynjur ia ki jingiakhih, ka party ka khlem ai jingbit ia ki dkhot ka Mahila Morcha ba kin leit ban ia shim bynta ha ka jingiakhih.
Ka party naduh ba sdang haduh mynta kam juh ia don bynta ha kino kino ki jingiakhih, ka party BJP ka dei shibynta jong ka sorkar bad haba shim ia kano kano ka rai da ka sorkar ka party BJP ruh ka kyrshan lang.
Lada ka don kano kano ka jingdawa da ki kynhun kam dei ban ktah ia ka shong suk shong sain , la ong ba kum kine ki jingjia ka ktah ia ki kam shangkai pyrthei ha kane ka jylla, ka BJP ka ong ba ka jingiakhih kam dei ka bynta jong ka imlang sahlang.
Ka jingktah kti ia u myntri rangbah ka jylla dei ban pynrem da baroh, ia kito kiba don kti ha kane ka jingkawang maw dei ban pynshitom katkum ka ain, ka party kan sa pan ia ka kaiphot na ki bor jong ki District bad ha dien kata kan sa leh ia ba don kam. La bthah bakn pynpoi ia ka kaiphot hapoh 15 sngi.
