Shillong, Jylliew 28: Ka seng BJP Meghalaya State Unit kan leit ban ujor sha iing bishar lada ki kompeni pynmih dewbilat ha ka jylla kim lah ban pynhiar ia ka dor jong ka dewbilat hapoh ka 30 sngi, la ong u Bah Bashai General Secretary jong ka party.
Haba kren ha ki lad pathai khubor mynta ka sngi ha ophis trei kam jong ka seng BJP, la ong ba ka jingkiew dor kynsan jong ka dewbilat ka long kaba la palat, na ka dor T.280 tyngka kaba juh long baroh shi katta ka la kiew dor haduh T.400 tyngka ha ka shi byrni. Ka jingkeiw dor ka long haduh 35 % kane ka long kaba ym lah ban pdiang.
Na ka liang jong u General Secretary jong ka party u Bah Khongwir u la ong ba ki kompeni pynmih dewbilat ha kane ka jylla kin nym nud ban leh ia kane lada kam dong ka jingiatip lang bad ka sorkar ia kaba la synshar da ka seng Congress. Lada ba lada ki kompeni pynmih dewbilat ki lah ban pynhiar dor ka seng kan leit ban ujor sha iing bishar.
Ki paidbah jong ka jylla ki tip shai ba ka dor jong ki mar ba kongsan ha kaba pynmih dewbilat kum u dewiong bad u Mawshun kila hiar dor sha ba palat, hynrei kumno kine ki karkhana pynmih dewbilat kila pynkiew ia ka dor dewbilat kaba la long palat pud. Ka BJP ka kynnoh ba kane ka pisa kaba la lute na ki paidbah ka dei ka pisa ban pyndon kam ha ka election ka ban long ha ka jylla, la ong u Bah Khongwir.
Na ka liang jong ka sorkar NDA kaba la ialam da ka BJP mynta kala buh teng shipor ia ka jingai subsidy sha ki karkhana pynmih dewbilat namar ka don ka jingsuba ba ia kane ka pisa paidbah la siew sha kitei ki karkhana da ka lynti kaba bakla la kynnoh. Kumba ka long ki don phra tylli ki karkhana dewbilat kiba ka BJP kala kdew kti ba kila pynkiew ia ka dor dewbilat.
Ka BJP kala jer kyrteng bad kito ki phra tylli ki karkhana shna dewbilat ki long ka Star Cement, Topcem Cement, Dalmia Cement, Hills Cement, Best Cement, Amrit Cement, Gold Stone Cement and Maxx Cement. Baroh kine ki karkhana shna dewbilat ki don ha East Jiantia Hills District.
Ka seng ka pynrem ia ka jingleh jong ka sorkar ba ha kawei ka liang ka khang ia ki trai jylla ba kin trei ia ka kam Mawshun bad ban phah ia u sha bar jong ka jylla, katb aia ki kompeni pat ka shah ia ki ba kin shallan ia u mawshun sha bar jong ka jylla. Ka BJP kan dang wat bniah ia kane ruh mynta ba kumno ki trai jylla ki sha khang katba ki company ki ioh ban shallan ia u Mawshun.
