Shillong, Jylliew 06: Ka seng Hynniewtrep Achick National Movement (HANM) mynta ka sngi kala leit ban ai da ka dorkhas sha u Chief Executive Member jong ka Khasi Hills Autonomous District Council, u Bah PN Syiem ban dawa na u ba ka executive committee ka dei ban ai ia ka No Objection Certificate ban shna ia ka surok na Nongstoin-Wahkaji bad mih sha Ranikor khlem da rung sha Mawthabah.
Haba kren ha ki nongthoh khubor ha dien ka jingiakynduh ia u CEM, u Bah Hamar Lyngkhoi Genenral secretary jong ka seng ba dei peit ia ka West Khasi Hills, u la ong ba ka seng ka dawa ba dei ban sdang trei noh ia kane ka surok na ka bynta ka jingmyntoi jong ki paidbah, hynrei kam dei pat ban rung sha Mawthabah.
Ka seng ka pyrshah ia ki jingtih Uranium, hynrei ka pdiang ia ki kam pynroi kiba ka sorkar ka wanrah sha poh jong ka West Khasi Hills, ki paidbah ka West Khasi Hills ki ia kynduh shibun ki jingeh tang namar bym biang ki surok, dei na kane ka daw ba ia kiba pang ba shitom la shukit ha ki khohdieng.
Ka seng ka dawa na ka sorkar ba ka dei ban sdang noh ia ka surok na Nongstoin Rambrai bad ban poi sha Kyrshai, kawei pat na Nongstoin Mawiet sha Kulang, kawei pat na Nongstoin Ahim bad sha Boko, kine ki long ki surok kiba don kam ha West Khasi Hills. U Bah Arphul K Bani president ka seng u la ong ba ka seng ka shai bha ha kaba ia dei bad kane ka phang ba kin pdiang ia ki kam pynroi hynrei ki pyrshah ia ki kam tih Uranium.
.
