Shillong, Jylliew 04: Ha ka jingialang kaba la long ha Shillong ha ka sngi thohdieng, ia kaba la ia shim bynta da palat spah ngut ki doctor na kylleng jong ka Ri India, kila ia kren ba ki nongpang shini ha kane ka Ri ha u snem 2030 kin kot sha ka 130 million ngut.
Katkum kane ka jingkhein kaba ki la ai ka Ri India kan sa wan ba ar ha ka jingdon ia ki nongpang shini ha kane ka sla pyrthei, ha kane ka sngi na ka liang jong u Lat ka jylla u la iakren bad ki doctor ban kylli kaei ka lad la lynti ban ia da ia ki briew na kane ka jinglang.
Ia mynta ka Ri India ka don palat ia ka 60 million ngut ki briew kiba don ia kane ka jingpang shini bad ha u snem 2030 ki briew kiba don ia kane ka jingpang kin kiew sha ka 130 million lada kane ka jingkiew jong kane ka jingpang kan sa phriang sted kumba ka long mynta.
Ia kane ka jingialang la pynlong da ka Meghalaya Diabetes Association da ka jingiatreilang bad ka public Health Foundation of India (PHFI), kaba na New Delhi, ha kaba u Lat ka jylla u V.Shanmuganathan u long u kongsan.
Ha kane ka sngi ki doctor kiba paw na kylleng jong ka Ri kila ia poi ha kane ka jingialang ban ia mir jingmut ha kaba ia dei bad kane ka jingpang, kane ka jingialang ka long kaba don kam namar kane ka jingkiew syndet jong ki briew kiba ioh iakane ka jingpang ka long kaba jyllei bha ha kane ka Ri India.
