Shillong, Naitung 15: U Shongknor jong ka ‘Khadi and Village Industries Commission, Ministry of Micro, Small and Medium Enterprises’, jong ka sorkar pdeng u Manoj Kumar u la wan sha Meghalaya bad ha kine ki ar sngi u la pynsngew ia ka jingangnud u myntri rangbah duh ka Ri India u Narendra Modi ban rah ia ka North East sha ka Pyrthei ha baroh ki liang.
Ha kine ki ar sngi kaba don ha Meghalaya, u la leit sha Pynursla Block bad Amlarem bad u la sam 400 tylli ki synduk ngap sha ki 40 ngut ki nongri ngap, la sam 20 tylli ki tiar shna light sha ki ar ngut ki samla pule ha Donbosco Technical School in Laitumkhrah, Shillong bad u la ia kynduh ia u mytnri rangbah ka jylla u Cornad ban ia mir jingmut ban kyntiew ia ki kam karkhana rit ha Meghalaya.
Ha kane ka jingwan u la kren halor ka jingthmu jong ka sorkar pdeng ban pyntrei kam ia ka Prime Minister’s Employment Generation Program (PMEGP) bad ia ka Gramodyog Vikas Yojana, la pynsngewthuh ba kumno ka Ri India mynta ka la long kawei na ki rib a paw ha ka pyrthei ha ka ioh ka kot. La ong ba ka KVIC kam dei tang ba ka ai jinghikai hynrei ka pynioh ruh ia ki tiar ban pyndon kam ha ki jingtrei.
Na ka liang jong u shongknor ka KVIC ka sorkar pdeng u la ai jingmut ia ka sorkar ba kumno ban ia treilang ha pdeng ka KVIC, ka State Khadi Board bad ka Khadi India ha ka jylla ban pynshlur ia ki briew ban tei ia ki iing basa ha Meghalaya lyngba ka skhim PMEGP, ha ka jingiakren u la kren shai ba ka jingwan jong u sha Meghalaya ka long ban pynshai ia ka jingangnud u myntri rangbah duh ka Ri India.
Ha Sohra u la leit ban jgnoh ia ki iing basa kiba la bei pisa lyngba ka skhim PMEGP kaba dei ka ram kaba T.10 lak tyngka bad na katei T.3.5 lak ka dei ka jingiarap kaba dei 35% ka jingiarap kaba ka sorkar ka ai. Ha kane ka jingwan u la ia kynduh mar khmat bad kito kiba la ioh ia kane ka skhim.
