Shillong, Naitung 09:Ki sengbhalang na ka thain Ri Bhoi sepngi ba kynthup ia ka WRBDC, FKJGP, HANM, CORP, RBYF bad ka WRBDSO ki la thaw noh da ka Western Ri Bhoi Joint Action Committee (WRBJAC) ban iatreilang hapoh kawei ka shatri na bynta ban peitngor ia ka roi ka par bad ka jingeh jong ka thain Ri Bhoi sepngi.
Ia kane ka rai la shim da ki sengbhalanag ha ka jingialang kaba la long ha iing dorbar ha shnong Patharkhmah ha kane ka lah sngi U Blei, hadien ka jingiaphylliew halor ia ka jingeh ki paidbah khamtam ka jingduh light kaba long khah khah ha kaba ki paidbah ki mad ia ka jingeh na ka por sha ka por, ka jingbym biang ki surok, ka network, ka koit ka khiah bad ki skhim pynroi bapher bapher ka sorkar jylla kaba long ka dawbah ban sahdien haba nujor ba kiwei kiwei ki jaka.
Ha katei ka jingialang ka WRBJAC ka la rai ban khot ia ki ophisar ka MeECL ba kin wan ban pynshai sha ki paidbah halor ka jingduh light kaba la ktah ia ki paidbah bad ki long iing kiba donkam ia ka jingshai ha ka por mynmiet myniong.
“Ngin khot iakren shwa ia ki ophisar ka MeECL ba kin wan ban pynshai ia paidbah halor ka jingbym poi thikna ka light”, la ong u bah Najim Kharmalki uba long u Chairman ka WRBJAC bad ula bynrap ba ia kiwei pat mat kiba iadei bad ka surok, ka network bad ki skim pynroi ka JAC kan sa shong pyrkhat ban ai da ka dorkhas sha ka sorkar jylla ban pynsngew ia ka jingeh ki paidbah.
Ha katei ka jingialang la ioh ban jied bad pynshkem ia ki nongkitkam ka JAC kynthup ia u Chairman bah Najim Kharmalki (WRBDC), Vice Chairman bah Kodios Thongni (HANM), Secretary bah Lawlyer Sangkli (FKJGP), Asstt Secretary bah Gabreil Diengdoh (WRBDC), Organising Secretary bah Apnas Thngkhiew (FKJGP) Publicity Secretary bah Lumkur Lapang (CORP) bad Advicer bah Snomik Kalwing Ex MLA, Jirang Constituency lem bad 11 ngut ki dkhot ka Committee.
Ha kajuh ka por, ka JAC ka ai khublei ruh ia ka seng National Khasi Union (KHU) Ri Bhoi District ban iadonlang ha katei ka jingialang ban pynpaw da ka mynsiem kaba sngewkhia halor ka jingeh ki paidbah.(SP News)
