Shillong, Rymphang 16: U Chairman jong ka Forum of Councils Under Sixth Schedule (FOCUSS) u Bah Pynsnghian N Syiem u ba dei u Chief Executive Member(CEM) jong ka Khasi Hills Autonomous District Council (KHADC) u la ong ba ka jingialang kaba la long mynta ka sngi jong baroh ki Autonomous Counsil jong ka dong shatei lam mih ngi jong ka Ri India kin sa phah da ka Memorandum sha u myntri rangbah duh jong ka Ri India ban kyntu ia ka sorkar pdeng ba kan thaw noh ia ka tnad sorkar ka ban peit ia ki ADCs kiba hap hapoh jong ka Sixth shedule.
Haba kren ha ki nongthoh khubor ha dien ba la wai kane ka jingialang, u Chairman jong ka FOCUSS u Bah Syiem u la ong ba, kane ka jingiakynduh ka jong ki mynta ka sngi kila shim ia ka rai ban phah da ka Memorandum sha u myntri rangbah duh jong ka Ri, bad ha kane ka memorandum kan kynthup ha kaba ia dei bad ka jingmang pisa ia ki ADCs da ka sorkar pdeng.
Ka sorkar pdeng ka dei ban thaw noh ia la ka jong ka tnad sorkar kaban peit ia ki ADCs a kane ka thain shatei lam mih ngi jong ka Ri India, bad kin ia kren ruh halor kane ka jingpynduna ia ka jingmang tyngka sha ki ADCs namar kam dei na ka daw ka jong ki ba kim lah ban ai ia ki certificate ba kila dep ban pynlut ia ka pisa hynrei ka dei na ka jingpynslam jong ka NITTI AAYOG ban phah ia ki kyndon bad ka jingbym lah ka sorkar ban pynlait ia ka pisa ha ka por kaba biang.
Ka daw ba ka sorkar pdeng kala ai ha kaba pynduna ia ka jingmang pisa na ka T.1000 klur sha ka shiklur na ka bynta ka snem mang tyngka 2016-2017 ka dei ba ki ADC kim shym lah ban phah ia ka “Utilization Certificate” ia kaba la tip kum ka UC, ka jingbym lah ban phah ia kane ka long ba ka sorkar haduh mynta kam pat pynlait ia ka pisa sha ki District Council.
Ka jingmang pisa T.1000 klur ka dei jong u snem 2015-2016 bad na ka bynta 2016-2017 la pynhiar sha ka T.1.00 klur bad na ka bynta u snem 2017-2018 la mang tang T.500 klur, halor kane kin sa leit ban ia kynduh ia u myntri ka pla pisa jong ka sorkar pdeng haba kut jong une u bnai lane jong u bnai ban wan ha ka taiew kaba nyngkong.
Kane ka jingleit ia kynduh ia u myntri pla pisa ka sorkar pdeng kan long da ka kynhun jong ki ADCs baroh jong kane ka dong shatei lam mih ngi jong ka Ri India ban pynsngew ha u myntri pla pisa ka sorkar pdeng ba ka jingbym lah ban ai ia ka UC kamd ei na ka jingbakla ka jong ki.
Na ka liang jong ki ADCs mynta ka sngi kila ia kren ban kyntu ia ka sorkar pdeng lada ki lah ban ai ia ka UC tang 70% ia kane kaba la dep ruh ka sorkar pdeng kan sngewbha ban pynkiew ia ka jingmang tyngka ia ki ADCs . Ha kane ka jingialang la ia kren ruh ba kim kynthup lang hapoh jong kane ka FOCUSS ruh ia ki Autonomous Council kiba hap hapoh jong ka Seventh Schedule ruh ba kin dup lah ban ia kren bad ka sorkar pdeng na ka bynta ka juh ka phang.
Ha kane ka jingialang la rai ruh ban thoh sha baroh ki myntri rangbah jong ki jylla kane ka thain bad sha ki MP baroh bakin kyrshan ia kane ka jingthmu jong ka FOCUSS na ka bynta ban pynkhlain ia ki ADC ha kane ka dong shatei lam mih ngi jong ka Ri India.
Ha kane ka jingialang jong ki ADCs mynta ka sngi la khot kyrpang ruh ia u Conrad K Sangma MP jong ka Lok shaba na Tura ba un ia don lang ban ia kren halor kane ka jingeh kaba ki ia kynduh ki ADCs khamtam eh kane ka jylla Meghalaya ha kaba ka JHADC bad ka KHADC kim pat ioh ia ka pisa na ka sorkar jylla haduh mynta.
