Shillong, Rymphang 15: Ka jingdawa jong ki paidbah ka Ri War Mih ngi ia ka Pynursla Civil Sub Division ka dei kaba la slem bah bad ia kane ka jingdawa la pynurlong mynta ka sngi ha kaba u myntri rangbah ka jylla u Dr Mukul Sangma u la leit ban plie ia ka bad kane ka Civil Sub Division kala trei ma naduh mynta ka sngi.
Haba kren ha kane ka jingialang paidbah ban plie ia kane ka Civil Sub Division kaba thymmai na ka liang jong u myntri rangbah la ong ba ki paidbah jong ka Pynursla ki long kiba don bok ha kaba, ki laioh ia ka C&RD Block, ka Police station bad mynta ia ka Civil Sub Division ha kaba ka sorkar ruh ka angnnud ban rah ia ki jingtrei kam jong ka kham jan sha ki paidbah.
U myntri rangbah u la ong ba ka sorkar kala ialeh katba lah ban pynioh ia ki kam pynroi bapher bapher sha ki paidbah ban pynthikna ba ka jylla ka dei ban kiew ha baroh ki liang. U myntri rangbah u la kyntu ia ki paidbah ba kin ia ka jingiatreilang bad ka sorkar na ka bynta ban pynpoi ia ki kam pynroi sha ki shnong ki thaw.
Kiwei kiba la kren ha kane ka jingplie ia kane ka Civil Sub Division kaba thymmai ki long u Bah Prestone Tynsong MLA jong kane ka jaka u ba dei ruh u myntri sorkar, u Bah HDR Lyngdoh myntri kam poh iing, u Deputy Commissioner jong ka East Khasi Hills u Bah P S Dkhar bad u Bah PD Rynjah Secretary jong ka Joint Action Committee for demanding Pynursla Sub Division.
Kane ka Civil Sub Division ka don haduh 171 tylli ki shnong , ha kane ka sngi u myntri rangbah u la plie ruh ia ka ophis trei kam jong u SDO(Civil) bad la plie ruh ia u Mawnongrim ban tei ia ka ophis jong u SDO, ha kane ka sngi la don lang ruh u myntri ba dei peit ia ki kam pynroi nongkyndogn u Bah S Dhar bad kiwei kiwei ki MLA ryngkat ha ka jingiadon lang u Chief Secretary jong ka jylla u K S Kropha bad kiwei ki ophisar.
