Shillong, Jylliew 8: Ka Apollo Hospital kaba paw bha ha kane ka Ri India kaba la pyniaid da ki riew shimet kaba don ha Chenai kala plie ia ka jaka ai jingtip ha kane ka nongbah Shillong na ka bynta ban suk ki paidbah ha kaba wad jingtip kumno ban leit sha sumar ha katei ka hospital.
Ki lad ki lynti kiba kane ka hospital ka ai na ka bynta ki paidbah jong kane ka jylla Meghalaya ka long ba ki lah ban buh sngi lypa bad ki doctor ha kane ka hospital haba ki kwah ban leit shah sumar.
Ban pynsuk shuh shuh iaki briew kane ka jylla na ka liang jong ka hospital kan leit ban shaw ia ki nongpang la ka long na kad liengsuin lane na jaka sangeh rel ha katei ka nongbah. Ki nongpang kim don kam ban siew wat ia ka bai Ambulance.
Ym tang kata kin pynwad ia ki jaka sah kiba bit dor bad lada don kam wat ia ki nongap ia ki nongpang kiba wan ban sumar ha kane ka hospital, na ka liang jong ki nongpyniaid ia kane ka hospital kila ong ba kino kino kiba kwah ban phah sumar ha kane ka hospital ki lah ban ia kren na Shillong da kaba phone ha kine ki phone number 9863317096 bad 9774535807.
Dr Anuradha Sridhar haba kren ha ki nongthoh khubor ha Shillong u la ong ba 41 percent na ki khynnah ha kane ka Ri India ki don ia ki jingpang , lada ka long kumne kan ktah ia ka lawei jong ka Ri, hynrei lada lah ban pynduna ia ka jingpang ha ki khynnah yn ioh ia ka ri kaba khlain ka long kaba don kam ban sumar bha ia ki khynnah.
Haba jubab ia ki jingkylli u Dr Sridhar u la ong ba ka daw tynrai ba ki khyllung ki ioh ia ki jingpang khamtam ka jingpang shadem ka dei na ka jingjaboh palat na ka jingdon ki plastic ha kane ka mariang, ha ba ia dei bad ka jingdih kyiad bad dih sikret ha ka por ba pun khyllung, ym pat lah ban pynshisha hynrei ka jingktah ka long ba ki khun kiba kha na kito kiba juh mlien ban dih kyiad ne sikret ka long ba ki khun ki long tlot.
