Shillong, Naitung 12: Mynta ka sngi ka Meghalaya Pradesh Congress Committee ryngkat bad ka party Indian National Congress kila pynlong ia ka jingiakhih kaba jar jar hapoh Congress Bhava ha Jail Road ban pyrshah ia ka rai ban pynduh jinglong dkhot kum u MP jong ka Lok Sabha ia u Rahul Gandhi u nongalam jong ka party.
Haba kren ha ki lat pathai khubor u nongalam ka liang pyrshah u bah Ronnie V Lyngdoh la ong ba kane ka jingiakhih kaba jar jar mynta ka sngi ka long ban ia shim bynta lang bad ka party baroh kawei kaba la pynlong ia ka jingiakhih mynta ka sngi ha kylleng ki bynta jong ka Ri India ban pynpaw ia ka jingpyrshah ia ka jingshah pynduh jinglong dkhot kum u MP Lok Sabha ia u nongialam jong ka party u Rahul Gandhi.
U bah Ronnie u la iathuh ruh ba kila iakren ruh na ka bynta ka MDC elekshon, MP elekshon ha kane ka jingiakynduh lang, kila iakren ruh ia ka MP elekshon kum ka party kumno kan iaid sha khmat ban pynkhreh, la iathuh ba na kidaw kiba ym lah ban kiar ki don ki MDC bad ki MLA ki khlem poi sha kane ka jingialang.
U President jong ka MPCC u bah Vincent H Pala u la ong ba kane ka jingiakhih kaba jar jar ka long ban ai ka jingkyrshan u u nongialam ka AICC u Rahul Gandhi, ia kata ka jigniarap ne ka bym lah ban iarap ia kata kin nym kren ei ei hynrei kaei ba ki leh ka long ba kum ka party na ka jylla ki don ryngkat bad u nongialam.
Ha kane ka sngi ki nongkyrshan jong ka party Congress na kylleng kila iapoi sha kane ka jingiakhih kaba jar jar ban pyni ba ki don ryngkat bad u nongialam jong ka party ha kane ka jingeh kaba u ia kynduh bad ki duwai naka bynta jong u.
