Shillong, Naiwieng 15: Ka sngi kaba ar jong ka India International, Cherry Blossom Festival, 2019 ka la sakhi ia 
ka jingshim bynta shitrhem jong ki paidbah ha man la ki prokram ba la buh na bynta kane ka sngi kynthup naduh ki nongwanjngohkai, ki trai shnong bad khamtam eh ki heprit.
Kaba kham khring eh ha kane ka sngi kadei ruh da ka jingdon jong ki jingiakob bapher bapher la ka long naduh ka jingiakob bam soh mynken, kaba long ha Wards Lake ha kaba ki la don bun bha kiba wan ban peitkai ia katei ka jingiakob kaba kham pher.
Ha ka jingiakob, u Leninston M Sangma bad u Aman Swer kiba la bam mar 14 tylli ki sohmynken ki la long ki nongjop, hynrei u Leninston u la ioh ia ka nam lahduh namar u pynlut ia kitei ki sohmynken ha ka por kaba kham duna. Katba u Aman pat u la wan noh ha ka kyrdan kaba ar, bud sa u Amos Nongrum uba wan ba lai da kaba bam 10 tylli.
U lahduh ha katei ka jingiakob u la ioh ban khur 5000 tyngka, katba uba ar u ioh 3000 tyngka bad uba lai u ioh 2000 tyngka. Shwa kane, ha kapor mynstep pat ka la don ka jingiakob mareh syntiew tynrai ha kaba ki la don haduh kumba 100 ngut ei ei ki nongshim bynta.
Hadien kane, ka la don ruh ka jingiakob dro bad ai rong kaba long ha State Central Library, nangta ka jingiakob siat khnam, ka jingpyni ksew, ki drama na ki khynnah skul, bud pat sa ka tem ka put kaba long ha madan Polo.
Kawei pat ka prokram kaba kham khring kadei ka jingiakob pyni khunlung kaba la pynlong ha Wards Lake. Ki nongjop ha kane ka jingiakob ki long ka Abigail Donna Shangpliang ba la shah jied kum ka lahduh, nangta ka Harshit Surana kaba wan ba ar bad Saanchi Chettri ha ka kyrdan kaba lai.
Ki tamasa kiba kham shongshit ha ka sngi kaba lai kata ha kane ka sngi Thohdieng ki kynthup ia ka jingialehkai tynrai jong ka jylla ha ka por 1baje mynsngi, kynthup ia ka Miss Cherry Blossom ha ka por 5 baje, nangta ka Plus Size Queen bad Mrs Shillong ha ka por 6.30 baje janmiet. Kan don ruh ka jingpyni ia ka phlim South Korea, “Confidential Assignment” ha State Central Library ha ka por 6:30 baje janmiet.
