Shillong, Nailar 24: U Symbud Myntri Rangbah ka jylla u Bah Prestone Tynsong u la iathuh ba ka tnad kam poh iing jong ka sorkar pdeng kala phah ia ka jingai jingmut sha ki sorkar jylla ban nym don shuh ka jingkhang ia ki barung ba mih ha ki jylla bad kane ka dei tang ka jingai jingmut na ka liang jong ka tnad kam poh iing ka sorkar pdeng ia kaba kila ia kren mynta ka sngi.
Haba phai sha ka jylla Meghalaya, la ong ba ka rai jong ka sorkar ha kine ki sngi kiba la dep ban don ka jingkhang 7 sngi ha ka taiew ba nyngkong jong u bnai ia ki jaka rung jaka mih ha ka jylla kan iaid kumba la dep ban rai, kata ka long na ka bynta ki lai bnai ki ban wan, u Nailur, Risaw bad Naiwieng.
Ka sorkar kala shim ia kane ka rai ka long ban ailad ia ki nongtrei kiba la trei miet sngi ba kin ioh ban shong thait kum ki briew ki don kam ban shong thiat 7 sngi ha ka shibnai bad ha ka juh ka sorkar ha kine ki sngi ba khang ia kine ki jaka rung jaka mih un synreit dawai ia kine ki jaka ban iaida na kane ka jingpang.
U Bah Tynsong u la ong ba baroh ki kyndon kiba la buh ban rung ban mih na kane ka jylla kan neh kum juh bad kiba rung sha ka jylla hap ban leh ia ka Antigen Test ha ki jaka rung bad ki kyndon kiba la pynbna da ka tnad ka koit ka khiah kin neh kum juh.
Na ka liang jong u Symbut myntri rangbah u bah Tynsong u la kyntu ruh ia baroh ki bor shnong bor thaw ha ka jylla ba kim dei ban pynmih ia la ki jong ki jong ki kyndon ki dei ban bud ia ki kyndon kiba la pynmih da ka sorkar ha kaba ia dei bad ka jingshong quarantine.
La ong ba ka sorkar kala ioh shibun ki jingujor ba ki don bun bah ki shnong ba kip hah shong quarantine ia kito ki briew kiba ia leit ia wan na kawei ka District sha kawei pat bad wat ia kiba wan sha Shillong, ki bor shnong bor thaw kim dei shuh ban leh ia kane namar ki briew kiba ia iaid ai ieng ki dei tang ki briew jong ka jylla kiba ia leit ia wan.
