Shillong, Naitung 10: U Myntri ki kam pohiing jong ka sorkar pdeng, u Rajnath Singh u la ong ba ka lynti sha ka ‘India kaba thymmai’ kan iaid lyngba ka roi ka par bad ka shongsuk shongsain ka ‘thain shatei lammihngi kaba thymmai.’ Haba ai jingkren ha ka jingialang pynhap pyrda jong 67th Plenary Session jong ka NEC ha nongbah Shillong mynta ka sngi, u la ong ba u Myntri Rangbah duh ka ri, Narendra Modi u don ka jingangnud ia ka India kaba thymmai hapoh u snem 2022. Ka jingkylla ka ban wan ha ka thain shatei lammihngi kan pynurlong ia ka jingangnud ban pynkylla ia ka ri baroh kawei, u la bynrap.
U Myntri ki kam pohiing u la ong ‘ka thain shatei lammihngi’ kan kiew da ka jingdon ia ki surok kiba bha bad ka teknoloji. “Ka thain shatei lammihngi ka donkam ia ka surok kaba bha bad dang shen ka la sdang iaid shakhmat ha kane ka liang. Ka jinglong ka ioh ka kot ha ka thain kan sa kiew da ka jingdon ia ki surok kiba bha,” ong u Rajnath Singh. “Lada ngi lah ban wanrah ia ki broadband service kiba biang ha ka thain ki samla jong ka thain shatei lammihngi kin ioh ki kabu hajan eh haduh iing ban wad lad ha ka liang ka ioh kam ioh jam. Kan pynsangeh ruh ia ka jingwantuid ki samla na ka thain sha ki bynta ba jngai jong ka ri,” u la bynrap.
U Myntri ki kam pohiing jong ka sorkar pdeng u la ong ba ki ITI bad ki Polytechnic kidei ban leh ia ka bynta ba kongsan ha ka liang ka jingkyntiew ia ki sap (Skill Development). “Ka NEC kadei ruh ban pyrkhat ban seng ia ka Regional Institute for Skill Development,” u la ong.
U Rajnath Singh u la ong ka jingpynshlur ha ka ioh kam ioh jam bad ka kamai kajih kan iarap ban weng ia ki jingeh kum ki kam pyntriem ha ka thain shatei lammihngi. “Ki jylla jong ka thain shatei lammihngi ki donkam ban thaw ia ka jinglong jingman kaba lah ban iarap ia ki nongbei tyngka khnang ba ki nongbei tyngka kin sngew shngain bad yn lah ruh ban weng ia ki jingeh jong ki bad kane kan kyntiew ha ka liang ka jingbei tyngka ha ka thain,” u la ong.
U Myntri ki kam pohiing jong ka sorkar pdeng u la ban ruh halor ka jingkyntiew ia ka rep ka riang khnang ban lah ban pynurlong ia ka jingangnud jong u Myntri Rangbah duh ka ri Narendra Modi ban pynlong arshah ka ioh ka kot jong ki nongrep hapoh u snem 2022. “Ngi dei ban phaikhmat halor ka jingrep ia ki jingthung ba duna bam jaka hynrei kiba heh dor ban shalan. Ka Railway Ministry ka lah ban iarap ban shalan ia ki mar kiba lah ban duh ne sniew noh bad ki jingthung kum ki Kiwi bad ki syntiew da kaba pynkit lyngba ka AC wagon kaba sted bha.”
U la ai jingmut ban pynthymmai ia ka North Eastern Regional Agricultural Marketing Corporation Limited (NERAMAC) ban pyniaid iew ia ki mar rep. “Ka North Eastern Region Community Resource Management Project (NERCORMP) bad ki Self Help Group (SHG) ki lah ban ai ka jingiarap ha kane ka jingpyrshang ban kyntiew ia ka ioh ka kot bad ban pynmih ki lad ai kam ai jam ha ka thain.”
U Rajnath Singh u la pynthikna ka jingkyrshan na ka sorkar pdeng sha ki jylla jong ka thain shatei lammihngi ban kyntiew ia ka jingdonkam jong ki pulit. “Ki jylla ka thain shatei lam mihngi ki dei ban shim kabu ia ka jingsuk jingsain bad pynkhlain ia ki tnat pulit ha kane ka thain.”
U Rajnath Singh u la ong ba man ka jylla jong ka thain shatei lam mihngi ka don la ka jong ka jinglong ba lah ban wanrah ia ka roi ka par. “Ngi dei ban wad bniah ia kine ki jinglong bad ngi dei ban trei shitom ban kyntiew ia kine. Dei ruh ban buh da ka por ban pyndep ia kane baroh,” la ong u Rajnath Singh. “Ngi dei ban pynthikna ban ym don ka jingsepei bad ngi dei ban pynthikna ruh ba ngi trei ha ka rukom kaba shai bad kaba shida. Nga kyntu ia ki myntri rangbah jong baroh ki jylla ka thain shatei lam mihngi ba kin trei shitom ban pynurlong ia kane,” u la ong.
Ha kane ka 67th Plenary ba ar sngi jong ka NEC la iadonlang u Minister of State jong ka sorkar pdeng ba dei peit ia ka tnad Development of North Eastern Region (DoNER), MoS PMO, Personnel, Public Grievances & Pensions, Atomic Energy and Space, Dr Jitendra Singh, uba long ruh u Vice-Chairman jong ka NEC, nalor ki Lat bad ki Myntri Rangbah bad ki heh ophisar na ki phra tylli ki jylla jong ka thain shatei lammihngi bad na ka Union Ministry of DoNER.
