Shillong, Jymmang 11: Halor ka jingkynnoh ba don ki nongtrei snaiap hapoh jong ka tnad ri khniang jong ka sorkar kumba la mih ha ki lad pathai khubor mynta ka sngi, u myntri rangbah u Dr Mukul Sangma u la ong ba, yn nym don ban lait na ka ain, kiba la leh bakla kin hap ban siew ai ka dor jong ka jingleh jong ki.
U myntri rangbah yn shym la batai aiu ka sorkar kan leh halor kane ka jingkynnoh hynrei u la ong ba ka sorkar ka don la ki jong ki lad ki lynti kumno ban leh ia kane bad yn nym lah ban iathuh paidbah kaei kaba dei ban leh, hynrei u la ong ba shisien ba la poi ha ka jingtip jong ka sorkar ka sorkar kan nym shu sngap.
U la iathuh ba la don bun ki ophisar ha West Garo Hills kiba la shah kem namar ki kam bakla jong ki, unu uno u ba la leh bakla yn nym lah ban phet na ki kti jong ka ain, ka ain ka don bad ki briew ki dei ban tieng ia ka ain bad la da ki briew kiba la tip ba ka don ka ain lada ki leh bakla kin ngat ha ka jingpynshitom jong ka ain.
Dei na kane ka daw ba ka sorkar kala wanrah ia ka Lokayata Actbad kum juh ia ka Social Audit Act, haba ia dei bad ka Social Audit act ia ki rule la shna mynta bad la jan dep mynta. Kine ki long nalor ka RTI kaba la don kine baroh ki long ban peit ba yn nym don ba lah ban iaid sha bar jong ka ain.
