Shillong, Naitung 29: Mynta ka sngi u myntri rangbah duh jong ka Ri India u Narendra Modi u la plie ia ka jingialang kaba ar jong ka Akhil Bharatiya Shiksha Samagam mynta ka sngi ha Bharat Mandapam, Pragati Maidan, New Delhi ban rakhe ia ka jingdap lai snem ka National Education Policy (NEP) 2020.
Ha kane ka jingilang mynta ka sngi la pynlait 100 tylli ki kot kiba ia dei bad ka rukom hikai ban pyntbit kyrpang ia kine ki kot lathoh ha ki 12 tylli ki jaid kiten jong ka Ri India, kane ka dei ka jingpynlait kaba nyngkong hapoh ka kshim jong ki skul PM Shri.
U myntri rangbah duh jong ka Ri India u la ong ba ka pule puthi ka dei ka thymmei ban poi sha kano kano ka thong ban kyntiew ia ka Ri India bad u myntri rangbah duh jong ka Ri u la ong ba u sngew kmen ban ia don bynta lang.
Ha kane ka sngi u Prof. Prabha Shankar Shukla, Vice-Chancellor, North-Eastern Hill University (NEHU), Shillong ryngkat bad ki nonghiaki bad ki khynnah skul kila leit ban ia shim bynta ha kane jingrakhe ia ka jingdap lai snem bala pyntrei kam ia ka NEP 2020 bad ha poh ka NEHU la sdang ban pyntrei kam mynta ba kin sdang naduh ka 01 Nailar 2023.
Kane ka NEP-2020 kan iarap shibun ban kyntiew ia ka pule puthi ha kane ka jylla Meghalaya namar kane ka polisi kaba mynta kan iarap ban pynkhlain ia ka jingtip tynrai bad ban pynmih ia u buid thymmai da kaba wat bniah.
Ka jingpeit skul noh shipor ha Meghalaya ka long 10% bad kane ka long kaei kaei kaba hap ban pyrkhat khia bha, kane ka polisi thymmai ka kren ruh ia ka lynti kumno ban iada ia ka mariang, kan ailat ia ki samla pule ban bteng biang na juh lada ki sngeh pule noh shipor.
Kane ka NEP,2020 kan peit kyrpang ia ki samla pule na duh ka por ba ki dang khynnah, ha ka juh ka por ka long ruh ban peit bniah ia ka sap ka phong kaba ki khynnah ki don, khnang ban dup lah ban btin lynti ia ki ban iaid sha khmat ha ka jingpule, da kane ka Ri India kan sa long ka ri kaba khlain bor.
