Shillong, Naiwieng 11: U Myntri Rangbah ka jylla u Conrad K Sangma haba jubab ia ka jingkylli jong u Zenith M Sangma ha kaba ia dei bad ka jingpynlong ia ka jingialang kabinet sha ki District , u myntri rangbah u la ong ba ka sorkar ia mynta kala pynsangeh namar kane ka khlam COVID.
Haba ia dei bad ka jinglut na ka bynta ki ar tylli ki jingialang kabinet kaba la long ha Tura bad Jowai u myntri rangbah u la ong ba ka jinglut ka long T.19, 18, 221 /- tyngka bad ka jingthmu jong kane ka long ban pynjan ia ki jingtrei kam jong ka sorkar sha ki paidbah.
Haba jubab ia ka jingkylli bynrap jong u Zenith na ka liang jong u myntri rangbah u la ong ba kam shym don kata ka jingpynthut ia ki ophisar ha ki District ia ka jingtrei kam jong ki bad kane ka jingleit ka long ban sngewthuh kham bha lada ioh da la ki jong ki khmat.
U Myntri rangbah u la ong haba ki leit ban pynlong ia kine ki jingialang cabinet ki don ruh ki jingialang ban ia kren ha kaba ia dei bad ki skhim bapher bapher kiba la pyntrei lyngba ki tnad sorkar bapher bapher ha ki district bad kane ka jingleit ka pynlong ruh ia ki ophisar ba sngewhun ba ki myntri ki shim khia ban wan peit ia ki kam.
