Shillong, Lber 10: U Chief Electoral Officer jong ka jylla Meghalaya u Bah Fredric Roy Kharkongor u la iathuh ba ka Election Commission jong ka Ri India mynta ka sngi kala pynbna ban pynlong ia ka MP ilekshon sha Lok Sabha ha ki hynniew bynta bad ia ka jingpynbna sorkar yn sa pynmih ha ka 18 tarik mynta u bnai.
Haba phai sha ka jylla Meghalaya u la ong ba, ka jingiathep vote na ka bynta ki ar tylli ki parliamentary Lok Sabha Constituency ka 1-Shillong bad ka 2-Tura kan long ha ka 11 tarik jong u bnai ioing bad ka jingniew ia ka vote kan long ha ka juh ka sngi ha baroh kawei ka Ri Iniadia ka 23 tarik Jymmang.
Haba ia dei bad ka jylla Meghalaya la ong ba ka jingthep ia ki nomination kan long naduh ka sngi ba pynmih ia ka jingpynbna sorkar ka 18th Lber bad ka sngi ba khatduh kan long ha ka 25 Traik Lber bad ka jingbishar bniah ia ki nomination kan long ha ka 26 tarik Lber bad ka jingthep vote kan long 11th Iaiong 2019 badka jingniew vote kan long 23th Jymmang 2019.
La iathuh ba ki paidbah nongthep vote ha kine ki ar tylli ki konstitwensi ka 1-Shillong bad ka 2-Tura ki don haduh 1892616 ngut katba ha u snem 2014 jong ka MP ilekshon ki nongthep vote ki don 1565820 ngut. Ha kane ka kynti kaba mynta ki bun ki kynthei ban ia ki shynrang, ki kynthei ki don 957900 ngut katba ki shynrang ki don tang 7686384 ngut. Ki kynthei ki tam da 20000 ngut ia ki shynrang.
Na ka liang jong u CEO jong ka Meghalaya u la ong ba ha kane ka ilekshon mynta kin pyndon kam ha baroh 3167 ki polling station ia ki EVM bad VVPAT. Na ka liang jong ka tnad ilkeshon jong ka jylla kala dep ban pynkhreh na ka bynta kane ka ilekshon. La ong ba la shai ka sngi yn sa khot ia ka jingialang bad ki seng sain pyrthei ha ka jylla.
Laiathuh ruh ba na ki 60 tylli ki konstitwensi ha kane ka jylla 22 tylli ki dei ki jaka ba juh mlien ban pyndon kam da ka pisa, na ka liang jong ka tnad ilekshon kan sa ia kren bad ka tnad Income Tax bad kum juh ka jingpynkhlaih ia ki flying squad ban teh la kam ia kane ka jingpyndon kam ia ka pisa. Ka jingpynlut jong ki kyrtong kan long T.70 lak tyngka na ka bynta ka ilekshon.
Na ka liang jong u Bah H Nongpluh ADG jong ki pulit u la ong ba tang ki bor pulit kiba don ha kane jylla kin nym lah ban biang, kumta kila dep ban thoh sha ka MHA jong ka sorkar pdeng ban pan shuh ki kynhun pulit na ka sorkar pdeng, hynrei katno don kam ym shym la iathuh namar ka khang ban iathuh ia kane.
