Shillong, Jymmang 03: Mynta ka sngi kala don ka jingiamir jingmut halor ka kam tih dewiong ha kane ka jylla ia kaba la pynlong da ka tnad Mining bad Geology Department, jong ka sorkar jylla. Ia kane ka jingialang la pynlong ha State Convention Centre, ha kaba u myntri rangbah ka jylla u Dr Mukul Sangma u la ia don lang bad u mytnri kam poh iing u Bah HDR Lyngdoh.
Haba kren ha kane ka jingiamir jingmut, ha kaba ki trai par dewiong bad ki seng nongkhaii dewiong kila ia don lang na ki bynta bapher bapher jong ka jylla, ha kaba u myntri rangbah u dei ruh u ba peit ia ka tnad marpoh khyndew u la ong ba la bun kiba la shah ktah na kane ka jingkhang tih dewiong bad kane ka jingiakynduh ka long ban wad kila ki lynti kumno ban lait na kane ka jingeh bad ban ialeh ban pynioh biang ha kaba ia dei bad kane ka kam tih dewiong.
U myntri rangbah u la ong ba namar ka jingtrei ha kane ka kam dei shuh ka jingtrei kaba rit, kane kala don kam ban don ia ki policy kiba biang ban pyniaid ryntih ba kin long kiba iaid beit katkum ki kyndon jong ki ain bapher bapher kiba ia dei bad ka khyndew ka shyiap bad ha ka juh ka por ym dei ban pynkhein ia ki ain kiba ia dei bad ka kam tih marpoh khyndew.
Ha kane ka jingiamir jingmut, u myntri rangbah u ong, ban ioh biang ia ka hok ban tih ia ki marpoh khydnew ka sorkar jylla kala ialeh ban ia kren bad ka sorkar pdeng ba dei ban pynlait ia ka jylla Meghalaya na ka Coal Mines (Nationalisation) Act 1973 bad na ki kato katne ki kyndon na ka Mines and Minerals (Development & Regulation) Act 1975 kiba hap hapoh jong ka Para 12(A) (b) jong ka Sixth Schedule jong ka Riti synshar jong ka Ri.
U myntri rangbah u la pynshai ba katkum ki kyndon jong ka ain Coal Mines (Nationalisation) Act 1973, la ong ba kino kino kiba kwah ban tih dewiong kin nym lah ban tih khlem da ioh ia ka jingbit na ka company jong ka sorkar lane hap ban shimwai na ki coporation kiba dei jong ka sorkar. Hynrei hapoh ka kyndon kaba 11 A(3) (a) jong ka Mines bad Minerals (Development & Regulation) Act 1975, ka ong ba ka jingai ia ki par dewiong sha ka company kiba dei jong ka sorkar jylla lane corporation lah ban leh khlem da iaid lyngba jong ki kyndon iathied, kane ka long katkum ka jingai jingmut jong ka sorkar pdeng bad ka sorkar Meghalaya kala ai ka jingtyrwa ia ka MMDC Ltd ba kan long ka State corporation ba kan long ka nongtih ha kane ka jylla katkum ka ain MMDR Act , 2015”, kumba la pynkylla.
U myntri rangbah ka jylla u Dr Mukul u la ong ba ka tnad Mining bad Geology kala budien ia kane bad ban pynkhreh ia ka mining plan kumba la kwah da ka NGT ryngkat bad ka CMPDIL, ka sorkar jylla kan dang iaid beteng ban ia kren halor kane ka kam ban pynlait ia kane ka kam tih dewiong khlem da weng ia kane ka jingkhang jong ka NGT, la ong ba nangne sha khmat don kam ia ka jingiatrei lang jong ki trai par , u myntri rangbah u kyrpad ia ki trai khyndew bad ia ki ba trei ia kane ka kam ba kin sngewthuh ia ka jingthmu jong ka sorkar khnang ba ka jingtih dewiong kan ia jingmyntoi ia ka jylla bad ia ki apteng ki ban dang wan.
Ha kane ka jingialang na ka liang jong ka MMDC Ltd ruh kala pyni ia ka power point kumno ban leh ha kaba ia dei bad kane ka kam tih dewiong, ba kumno ka MMDC Ltd kan ia don bynta ha kane ka kam ha kaba ia dei bad ka jingtih dewiong, ha kane ka sngi kala don ruh ka jingiamir jingmut kala don ruh ka jingbuh ia ki jingkylli bad ki jingai jingmut, ia kum kine ki jingialang yn pynlong ruh ha Jowai bad ha South Garo Hills District.
Kiwei kiba la ia don lang ha kane ka sngi ki long u MLA jong ka Khliehriat, u Bah Justine Dkhar, Additional Chief Secretary, Mining and Geology, u Y Tsering u ba la pyniaid ia kane ka jingialang u Bah W Khyllep, Secretary, Law, ka Secretary, Mining bad Geology, M N Nampui, Director, Mineral Resources, u R P Marak, ki heh jong ka tand khlaw, na ka Pollution bad ka tnad Labour.
