Shillong, Jymmang 27: Ka Kabak Yano, ka nongkiew lum na Arunachal Pradesh ka la thaw histori da kaba poi sha ki kliar jong u Lum Everest ha ka 21 tarik u Jymmang, 2024.
Lyngba kane ka jingjop, mynta ka long ka longkmie kaba 5 na Arunachal Pradesh bad ka longkmie ba nyngkong na ka jaitbynriew Nyishi ban leh ia kane ka kam kaba khraw.
Ka Kabak Yano, ka la sdang ia kane ka jingleit sha u Lum Everest ha ka 27 tarik u Lber haba ka la leit sha Katmandu. Hadien ki jingpynkhreh ba bniah, ka la poi ha base camp ha ka 17 tarik u Iaiong bad ka la poi sha ki kliar jong u Lum Everest ha ka 21 tarik u Jymmang, 2024.
La kha ia ka ha ka 5 tarik u Nailur, 1999 ha Arunachal Pradesh bad ka jingiaid lynti jong ka Kabak Yano sha kane ka kam kaba khraw ka la long lyngba ki jingeh kiba bun, khamtamhadien ka jingkhlad noh jong u kpa ha u snem 2022.
U kpa jong ka Yano u trei kum u labour ha ka Public Works Department (PWD). Hadien ka jingkhlad jong u kpa, ka Yano ka la shim ia ka jingbahkhlieh ban pyndap pynbiang ia ka longiing. Khnang ban pyndap ia ka bai pule lajong bad ki jingdonkam jong ka iing, ka la trei shibun ki kam.
Ka la trei kum ka bouncer bad ka la trei ruh ha ka dukanpynbhabriewia ki longkmie bad ka la pyrshang ruh ia ka kam kaba iadei bad ka jingdie jingthied ia ki jain. Kane baroh ka la wanrah ia ka jingskhem jingmut ha ka bad kane ka la iarap bha ha ka kam kiew lum jong ka.
Ka Yano ka ioh mynsiemna u Abraham TagitSorang, u nongkiew lum ba pawnam na Arunachal Pradesh. Ki jingjop jong u bad ka jingskhem jingmut jong u ki la ialam lynti ia ka Yano.
Ha ka por ba ka dang kiew ia u Lum Everest, ka Yano ka la iakynduh shibun ki jingma kum ka jingiaid lyngba ka Khumbu Icefall, ka jingkiar ia ki thliew kiba jylliew bad ruh ka jingialeh pyrshah ia ka jingstang ka lyer ha kine ki jaka ba kynjiang bha.
Ka Kabak Yano ka dang pule Post Graduate Diploma ha ka Fitness Management ha RashtriyaRaksha University (RRU) campus ha Pasighat, Arunachal Pradesh. Kum ka jingai jingburom ia kane ka kam ba khraw jong ka Yano.
Ka Rashtriya Raksha University ka thmu ban ai jingkyrshan ia ki kam ban wan jong ka lyngba ki jingpyntbit shuh shuh, ki jingiarap ha ka bai pule bad ka lad ruh ban long nonghikai. Kane ka skul bah ka thmu ban pyndonkam ia ka jingiaid lynti ka Yano kum ka nuksa ia kiwei kiwei ki samla pule.
