Shillong, Risaw 03: Ka KHNAM State Youth Wing ka sngewkhia bad ka pynpaw ia ka jingbym ia hap, ia ka jingdawa jong ka Assam Meghalaya Pease Forum (AMPF) ban pyntrei kam noh daka Arm Forces Special Power Act (AFSPA) ha Garo Hills. Kadei ka jingshisha baki kam pyntriem ki la kiew bha ha Garo Hills ha kaba ki riew paidbah ki la shah ktah jur, hynrei kane kadei ka phailure jong ka Sorkar Jylla bad ngi dawa baka sorkar jylla kadei ban shimkhia ban wanrah iaka jingshong shngain jong ki paidbah ka thain Garo Hills.
Ka jingdawa jong ka AMPF ban pyntrei kam daka AFSPA ha Garo Hills kan ktah shibun ia ki paidbah ka Garo bad ia baroh kawei ka jylla, khamtam iaki shong ki thaw ki ba ha khappud bad ka Garo Hills. Ha u snem 1958 ka sorkar India ka la thaw ia ka AFSPA, bad kane ka ain ka la ktah ia ka hok longbriew manbriew jong ki paidbah ba sah ha kane ka thain Shatei Lam minngi.
Naduh ba la pyntrei kam ia kane ka ain naduh u snem 1958 la iohi ba kane ka ain kam lah satia ban pynduh ia ki kam lehnoh, hynrei kala kylla long pynban ka lad ia ki shipai ban kput ia ki lui lui, namar kane ka ain ka aibor ia ki shipai ban kem lane siat ia kino kino ki ba leh beain wat ia kito kiba la shu suspect ruh.
Ka jingdawa jong ka AMPF bad pyntrei kam daka AFSPA ha Garo Hills ka long kaba sngew thamula bad lehse kaba don eiei sha lyndet, namar kumba iohi hi ba baroh kawei ka thain shatei lam mihngi ki ieng haka wei ka sur ban pynduh noh ia kane ka ain.Ka KHNAM ka kyntu ia ka Assam Meghalaya Peace Forum ban kit khia bad phai khmat sha ki jingeh jong ki paidbah ki ba shong ha ki shnong ki ba don ha ki khappud jong ka Assam bad Meghalaya.
Ki jingjia ha Langpih ka jingshah siat ki nong shong shnong jong ka Langpih, ka jinghiar thma jong ki bor ka Assam ha ka shnong Madan Umwang, ne Block I Block II, lane ka jingia kajia ki paidbha ha ki shong khappud ha Garo Hills bad bun ki jingeh ki jingshitom ki ba jia ha ki shnong khappud Assam Meghalaya ka la knieh noh ia ka jingshong suk shong sain jong ki paidbah kine ki thain la 44 snem bad kane ka forum kadei ban phai khmat sha kine ki jingeh, bad ka seng ka kyrshan iaka jingdawa jong ka AMPF na ki pulit bad ki bor synshar District ban shim khia ban ioh pyllait ia ki 8 ngut ki nongkhaii ba la shah rahbor ha ki seng leh noh. Hynrei ka seng kam sngewdei ban pyntreikam da ka AFSPA ha ki thain Garo.
