Shillong, Nohprah 30: U Bah Daniel Khyriem president jong ka seng Khasi Student Union (KSU) ha ba kren ha ka jingialang ban buh syntiew ban kynmaw burom ia ka sngi iap ba 154 snem jong u Kiang Nangbah mynta ka sngi ha Jan Civil Hospital, u la kyntu ia ka Girls Wing ba kan shim khia ban iada ia ka jingshah thombor ki long kmie bad ki hep rit kynthei.
U la ong ba kum ka seng haba ki paidbah ki wan ban ud ban nam ia ka jingeh jong ki, ka seng ka bynshet pat ia ka kam sha ki nongialam jong ki shnat bad ki unit jong kata ka dong bad ka thain ban kin peit ia ka khia ka shon jong ki paidbah ban leh ia kaba dei na ka bynta ka bha ka miet jong ki paidbah.
U ne u nongialam ba rangbah jong ka seng KSU, u la ong ba, ha ka por jong ki dohlieh kila wan sha kane ka Ri kum ki nongkhaii bad suki pa suki ki knieh ia ka bor synshar bad kane ka wan jia biang mynta ha kaba ki briew kiba wan na sha bar ki wan ban trei tang ban im ja kpoh hynrei mynta kila sdang ban tuklar sa ia ka synshar khaddar da kine ki briew kiba la ban kyrthep sha kane ka jylla khamtam ha kane ka nongbah Shillong.
Ka nongrim ba ka seng KSU ka ieng naduh kip or ba mynshuwa bad mynta bad kito kiba dang wan ba ki dei ban kynmaw ban bat ia ka nongrim jong ka seng ba kum ka seng kan nym ailad iano iano ban pynia paid ia pra bad kata ka dei ka nongrim ba ka seng ka ieng nalor kiwei kiwei ki kam kiba ka seng ia juh ialeh na ka por sha ka por. U la ong ba u don ka jingngeit kaba skhem ba ka jaidbynriew kan dang iai sei, ia ki Kiang Nangbah, ki Tirot Sing ban ia da na ka bynta ka jaid bynriew.
Ha ka jingkren jong u Chairman jong ka NESO u Bah Samuel B Jyrwa, u ba u Kiang Nangbah um dei u syiem ne u myntri, u dei u riew paidbah, hynrei u la ieng ban ia leh pyrshah ia ki phareng ha ktio ki snem khlem jingriej, u la kyntu ba to kum ki riew paidbah dei ban shim ia kane ka nuksa ban nym tieng ne riej ban kren ia ki jingshah haba ka don kano kano ka shah thonbor leh bor ia ka jaidbynriew dei ban mih sha khmat ban kren ia ka jingshisha. U la ong b aka iktiar bad ka bor ba khlaim tam ka long ba dei ban don ia ka mynsiem ia leh.
Ha ka jingkren jong u Bah Jeo Joplin Marbaniang u wei na ki dkhot jong ka Central Body jong ka seng, u la ong ba kano kano ka jaid bynriew kaba dang kynmaw burom ia ki nongialam jong ka jaidbynriew kata ka jaid bynriew ka dei ka jaidbynriew kaba im. Kum ka jaid bynriew mynta ka don hapdeng ka jingialeh kiba bun, kumta ai ba kane ka mynsiem ieit ri jong u Kiang Nangbah kan dang ia kyrsoi ha ki briew ba kin dang mih ki briew ban iada ia ka Ri bad ka jaidbynriew.
Ia kane ka jingialang ba lyngkot la pyniaid da u Bah Augster Jyrwa Genenral secretary jong ka seng, kiwei kiba la leit ban buh syntiew ha u mot jong u Kiang nangbah mynta ka sngi ha Shillong, ka dei ka Dorbar shnong Wahthapbroo, ka Kur Nangbah Mawlong, Ka KHNAM, Ka BJP.
