Jowai, Naitung 02: Ka KSU Sonapyrdi Unit ka kyrpad ia ka CAG ban ym shaniah ia ka kaiphod ba la ai da ka Meghalaya State Pollution Control Board halor ka jingkam jong kane ka tnat ba ka jingjaboh bad ka jingkylla rong blue bad ka jingiap ki dohkha ha Wah Lukha ka dei na ka jingtuid ki acid jong ka jingtih dewiong.Ka seng ka kyrpad ia ka CAG ban phah leit jurip shaduh trai ba mih ki jaboh ban lap ia ka jingshisha nangno kine ki jakhlia ki wan. ym tang ban shaniah beit ha ka report jong ka MSPCB.
Ka seng kam shaniah ia kane ka report jong kane ka tnat,imat don eiei sha lyndet.Hato ka Comptroller and Auditor General ka sorkar pdeng ka tip naduh mynno la sdang ka jingtih dewiong sha ki thain East Jaintia Hills Dist ? Hato kane ka tnat wad jingtip jong ka sorkar pdeng ka tip mo mynno bad ha u snem,bnai bad tarik aiu la jia ka jingkylla bih kynsan ka wah Lukha bad da ki phew hajar tylli ki dohkha bad rit bad khraw ki per ha sla um bad ka jingsma iwtung bymlahbatai.
Hato kane ka tnat wad jingtip ka la dep wad ne em ia ka jingshisha shaduh sha khlieh jong ka Wah Lukha ba la tip kyrteng ‘Krem ,Mahabon’ bad kham haneng kane ka krem don ar tylli ki wah kawei kaba kyrteng Wah Lunar bad kawei pat ka Wah Lukha.Kine ki ar tylli ki wah ba iasoh lang, kawei na Mihngi bad kawei na Sepngi.Ka Wah Lunar ba wan ,na sepngi bad ka Wah Lukha ba wan na mihngi ki iapher bak- ly-bak ha
ka jingkhuid.
Ka Wah Lukha ka long ka wah bakhuid khlir khlir kum ha kito ki por barim bad kaba shngiam ban dih,hynrei haba phai sha ka Wah Lunar tang ban iuh kjat ruh ym nud namar ka jingjaboh ba wan tuid na ki kharkhana dewbilat.Shuwa ban wan ki kharkhana dewbilat sha ki thain Narpuh,ia u Dewiong lah dep tih la 40 snem mynshuwa,dei ha u snem 2007 jong u bnai Rymphang(Feb) la jia kynsan kynsan ka jingkylla rong blue ka Wah Lukha naduh trai ba iasoh lang bad ka Wah Lunar shaduh Bangladesh.
Ki paidbah nongshong shnong jong ka thain khamtam kito ki nongbylla ki pynpaw ia ka jingpangnud namar kane ka jingjia ia ka Wah Lukha ka long kumba pynduh jakpoh shisyndon ia ki ba duk bapli ba im kamai man ka sngi na ka jingtong dohkha ban bsa khun.Kumno kata ka acid dewiong kam shym wan tuid naduh mynshuwa ha ki snem ba leit shwa bympat wan kine ki kharkhana dewbilat.Balei ka jingkylla rongblue ka Wah Lukha ka jia tang ha ka por tlang ? Kumno kata ka acid dewiong ka lah ban wan tuid ha ka por tlang tang slap ruh ym don ? Ka acid dewiong ka wan tuid ha ka por lyiur ba jur bha u lapbah lapsan bad ngi ithuh bha ia ka um dewiong namar ha sla um(Water Surface) la iohi kum ka kynja phniang ne kum ka acid bad ka um ruh ka kylla rongsaw jnguid.
Hynrei ha ka por tlang tang shu kylla rong ka wah lada sum u sniuh ruh kylla eh thik kum kato ka um cement bad sha trai jong ka um la long thik kum u dpei ne flyash.Na ka liang ka Seng ka kyrpad ia ka CAG ban lum kaipod da lade ym tang shu pdiang ia ka report jongka MSPCB namar ka report jongka kam shym la ai jinghun ia ki paidbah.Ngi kiba sah sha kine ki thain ngi tip khambha ia jinglong jingman jongka Wah Lukha namar ngi im ngi bam ngi dih ha ka,ngi long ki nongsumar khuid ia ka,ngi sngewsih ba ki nongwei ki wan ban pynjot ia ka.Ka seng ka sngewlyngngoh ruh ia ka jingiada burom ka CAG Ia ki Cement Factory bad ka jingbuhrieh khop ia ka kyrteng jongki khlem pynpaw tang tiak
ruh.
Ki shu shong napdeng sor bad kner ia la ki kti ia ka report jong ka MSPCB bad pynbna ha ki kot khubor ba dei ka acid dewiong.Shuh ka seng ka ong,balei ka sorkar kam lah ban leh ia ka jingtohkit ba laitluid(Independent Inquiry) halor ka wah lukha, wat la na ka liang ka KSU Narpuh Circle ha kine ki bnai ba la dep ka lah dep ai da ka jingthoh sha u Deputy Commissioner jong ka East Jaintia Hills District ban dawa ban pyndep ia katei ka jingtohkit.Ka seng ha ka kyrwoh ba la phah da u President ka seng u Samla TL Gympad uba bat ruh kum u Education Secretary ka KSU JHDU,u la ong shibun ki wahduid ba don sha ki thain Lad Rymbai,Khliehriat bad Byndihati kim shym la kylla rongblue kumba jia ia ka wah lukha namar ym don kharkhana shato.
Hato kine ki nongwad bniah kim iohi ia kane ? Kan bha ia ka MSPCB ne ia ka CAG ban leit jurip ia ka wah lukha ha ka por ba kylla rongblue,bad ngi kloi ban ialam ia ki shaduh sha kitei ki jaka ba iasoh ka Wah Lukha bad Wah Lunar wat lada ngi lah poi katno sien.(SP News)
