Shillong, Nohprah 11: La plie ia ka Meghalayan Age Store ha ka 9 Tarik U Nohprah 2021, kane ka jaka die jingdie kan long kum ka rynsan kaban iarap ia ki nongshna tiar kti, ki nongthain jingthain bad ki nongrep ka jylla ba kin lah ban pyniar ha ka jingpynpoi ia ki mar ki mata jong ki sha kiwei kiwei ki bynta jong ka ri India bad sha bar ri.
Ha kane ka jaka die, don shibun ki jait tiar ba la shna kyrpang ba kynthup naduh ki khiew khyndew na Larnai haduh ki jain Ryndia. U Piyush Goyal, u myntri ka tnad Textiles bad Commerce & Industries, u la plie paidbah ia kane ka jaka ha ka jingiadonlang jong u myntri rangbah ka jylla Meghalaya U Conrad Sangma.
Ka rukom shna ia kane ka jaka die jingdie ne ka dukan ka pyni ia ka jingriewspah ha ka riti dustur jong ki lai tylli ki kynhun riewlum jong ka Meghalaya, Ki Khasi, Jaintia bad Garo, ha kaba la shna ban pyni ia kane ka riti dustur ha ka rukom jong ka juk ba mynta; kaba long kaei kaei kaba pyni shisha ia ka jingiasoh jong ka jylla bad ki tynrai lajong kiba naduh hyndai.
Nalor kane, ha kane ka dukan la die ruh ia ki mar ki mata kiba la pynmih na ki jingthung jingtep kum u Shynrai Lakadong, ka ngap khlaw bad ka jam Sohiong Jam.
U Conrad K. Sangma, myntri rangbah ka jylla Meghalaya u la pynpaw ba “Kane ka dukan kan long kum ka rynsan na ka bynta ki briew jong ka jylla Meghalaya ba kin pyni nam ia ki mar ki mata jong ki bad ki sap ki phong hangthie ha nongbah ka ri, khnang ba ki kino kino kiba don ka mon ban siew ia ka dork aba heh na ka bynta kine ki mar ki lah ban thied ia ki”.
