Shillong, Kyllalyngkot 8: Ka Meghalaya Editors’ and Publishers’ Association (MEPA) kaba dei ka kynhun ba ha khlieh duh jong ki nongthoh khubor ha Meghalaya ka pynpaw is ka jingsngewkhia kaba khraw halor ka jingjia kaba la jia ha ka 6 tarik Kyllalyngkot, 2020 ha Main Secretariat, Shillong ha kaba uwei na ki nongthohkhubor ba pawkhmat u E M Jose u la shah leh khlem akor bad shah kren khlem akor ha u Myntri Kam Pohiing ka Jylla, u James K. Sangma.
Ka MEPA ha ka jingiakynduh ba kyrkieh mynta ka sngi ka 7 tarik Kyllalyngkot, 2020 ka la iakren sani halor kane ka jingjia bad ka sngew ba kane ka jingleh khlem akor jong u Myntri Kam Pohiing ia une u nongthohkhubor ka long ka bym iahap katkum ka kyrdan ba une u myntri sorkar u bat khamtam ba une u nongthohkhubor lem bad ki para nongthohkhubor ki la ap ban iakynduh ia u Myntri Kam Pohiing ban iakren halor kiba bun ki mat kiba iadei ba ka jylla.
Namar ba u James K. Sangma u dei ruh u myntri uba bat ia kiba bun ki tnat sorkar bad ruh naba u dei ruh u nongaiktien (spokesperson) jong ka Sorkar MDA, ka dei ka bynta jong ki nongthohkhubor ban iakynduh ia u ban iohsngew aiu ka sorkar ka pyrkhat ne don ban leh ha kaba iadei bad kiba bun ki mat jong ka jylla. Ka MEPA ka pynrem jur ia ka rukom leh jong une u myntri sorkar khamtam ka jingtur jongu bad ki ktien ba u kren pyrshah ia u nongthohkhubor u E M Jose.
Kumta, ka MEPA ka la shim ia ka rai ban dawa jingpanmab mardor na u James K. Sangma namar kane ka jingjia khnang ba kum kine ki jingjia kin ym dei ban jia shuh sa shisien. Ki nongthohkhubor ki don ka hok ban kylli jingkylli ia kito kiba don ha ka bor bad lada ia kane ka hok la thombor noh, ka lawei jong ka synshar paidbah kan long kaba dum.
