Shillong, Naitung, 02: U Myntri Rangbah ka jylla Meghalaya, u Conrad K Sangma u la plie iaka Meghalaya Teacher Training Academy (MTTA), ha ka jingdon lang u Myntri Rangbah ka pule puthi, u bah Lakmen Rymbui, ki heh nongtrei bad ki nongseng kam la jong na ki bynta jong ka pule ka puthi.
Haba kren ha katei ka sngi, u la ong ba katba la don lypa katei ka iingmaw kham mynshuwa, “mynta ka dei ka jingsah jingkynmaw jong ka jingsdang ia kane ka jaka pule, ka jingiohi jngai, jingmut bad ka jingtreikam jong ka.”
Da kaba ai khublei ia ka tnad pule puthi, u la ong ba kane kam dei ka kam pynroi, hynrei ka dei shaphang ka jingtreikam kaban pyn pynshkem iaka nongrim jong ka pule dangle ha Meghalaya. Kane ka jaka ai jingpule ka long kaba kongsan ha kaban weng iaki jingduna, khamtam ha ka jingai jinghikai iaki nonghikai.
Ka jingpyn mih iaka MTTA kala wan na ka jingban jur halor ki jingeh ba la kdew jingkhein kiba paw ha ka ri baroh kawei, kynthup iaka PGI 2.0 bad PARAKH Rashtriya Sarvekshan 2024, kaba la pynwan iaka jylla Meghalaya ha ka bynta ba shapoh ha ka jingduna ka pule puthi (Akanshi-3) hapdeng ki khynnah skul.
Katkum ka jingkhein ka ong ba tang kumba 17 persen ki nonghikai ha ka jylla kila iashim bynta ha kino kino ki kam pynroi iaki kam bapher ha u snem ba la dep.
Da kaba pynithuh ia kane, ka sorkar kala kiar na ki prokram ai jinghikai ba tlor, jah bad ba mih shipor na ka bynta ki jingialang hikai ba la pynbeit ryntih kaba shong nongrim.
La pynmih iaka MTTA kum ka kynhun ba la seng katkum ka ain ka sorkar kaba iohlad ban synshar khlem ka jingshah teh hapoh ka Meghalaya Societies Registration Act, 1983.
U la kren shaphang ki mat ba kongsan ba la shim da ka sorkar, kynthup iaka jingkhein bad ka tulop jong ki 23,000 ngut ki nonghikai SSA, ka jingthmu kaba kynthup iaka jingkular pisa man la u snem kaba jan kot 800 klur.
