Shillong, Naitung 27: Ka seng Hynniewtrep National Youth Front (HNYF) East Khasi Hills hynne ka sngi ka 27 tarik naitung 2023 ka la pyntip ba ka Meghalaya Urban Development Authority (MUDA) kala pynmih da ka jingpyntip ba la pynsangeh ia ka jingtei thymmai ha Them Iew Mawlong.
Upresident ka HNYF East Khasi Hills u bah Bless Dkhar Haba kren sha ki lad pathai khubor, u la iathuh ba ia kane ka jingtei thymmai, la tei hadien jongka Thangkhiew Petrol Pump bad kane ka Building ka dei jong ka kong Phibora Marwein.
U bah Bless ula ong ba ka jingpyrshah jong ka seng ban tei ia ka jingtei thymmai ha Them Iew Mawlong ka dei namarba, kane ka jaka ka dang don hapdeng ka mukotduma ha Meghalaya High Court namar ka sorkar jylla ka dang ialeh ban pynkynriah ia ki briew ba sah ha kane ka jaka sha kawei pat ka jaka.
U bah Bless ula iathuh ba naduh ba la paw ba don ki ba la sdang ban tei jingtei thymmai ka seng ka la leit ban kynduh ia ka Shillong Municipal Board (SMB), ia ka MUDA ban lap ia ka jingshisha.
Haba kylli mano ba ai jingbit ban tei jingteithymmai ha Them Iew Mawlong u bah Bless u la ong, Kumba paw naka jingpyntip ba la pynsangeh ia ka jingteithymmai ka dei hi ka MUDA ba ai jingbit namar lada kam ai jingbit, kam don ban pynsangeh ia ka jingtei thymmai. U bah Bless Dkhar u la kam ba, kane ka jingshim khia jong ka seng, ka pynlong ia ka MUDA ban pynsangeh ia ka jingtei thymmai ha Them Iew Mawlong.
