Shillong, Naitung 22: Ki nongialam jong ka jong ka seng NESO, KSU, JACSO bad LYWA ha dien ba la dep ia kren bad ka sorkar kila pynpaw ba kin pyrshah beit ia ka jinghmu ban shna ia kane ka surok “two lane” ban leit sha ka Mawthabah.
Haba kren ha ki nongthoh khubor u Bah Samuel Jyrwa Chaimran jong ka NESO, u la ong ba ka nongrim ba ka seng ka iing ka long kaba shai kdar ba ka pyrshah ia ka jingtih Uranium ha kane ka dong shatei lam mih ngi jong ka Ri India, ka jingthmu jong kane ka surok ban shna na Nongstoin sha Mawthabah ka thew ban pynsuk ia ka kam tih Uranium.
U la ong ba kum ka seng ka pynpaw ia ka jingsngewnguh ia u myntri rangbah ka jylla u Dr Mukul Sangma ba u la ong ba ka sorkar kan nym shah ban leh kino kino ki kam pynroi ia ka UCIL sha katei ka thain bad ban thoh sha ka UCIL ba kan pynduh noh ia ka EOI kaba la pynmih ha kine ki sngi bad ban pan jingpynshai na ka tand shna surok jong ka sorkar pdeng.
U Bah Daniel Khyriem President jong ka KSU u la ong ba ka seng kan iai pyrshah beit ia kane ka jingthmu ban shna surok two lane sha katei ka jaka bad kane ka paw shai ba kan jingmut kaba sha lyndet ka long beit ban tih Uranium ha ki por ki ban sa wan. Ka jingthmu ban shna ia kine ki surok ka long ban pynsuk ia ka kit ka bha jong ka UCIL ban poi sha kane ka jaka.
U Bah Robert J Kharjahrin nongialam jong ka JACSO, u la ong ba kum ka kynhun kin pyrshah beit ia kane ka surok, ka sorkar lada ka sngew ba don ban kam shna ia kine ki surok ka dei ban long tang ka single lane kumba ki la juh kren bad ban ai surok ia ki shnong ka tei ka thain khlem da ia pein da u Uranium.
Halor kane ka phang ka kynhun ki seng bhalang hapoh jong ka Lama jong ka JACSOkin thoh sha baroh ki MLA, Ki MDC, ki Rangbah shnong ki Syiem ban kylli na ki ki don aiu ban ong halor kane ka bynta, ha ka juh ka por la ong ba lada ka District Council ruh kan khot ia kum kane ka jingialang kan long kaba bha ban ia kren markhmat kiba pyrshah bad kiba kyrshan.
Na ka liang jong u president ka LYWA u ong ba kum u trai shnong na katei ka thain u sngewthuh ba kane ka surok ban shna kan long ban poi sha ka thong ban tih Uranium ha kaba ka seng bad ki briew na katei ka thain ki pyrshah jur.
