New Delhi, Jymmang 30: Naduh ki sngi ba nyngkong, ka Sorkar Modi ka la kwah ban pynkylla ia ka jingpeit shiliang kaba la shong tynrai ha ki hynriewphew snem hadien ka jingioh jinglaitluid, kaba leh klet ia kito kiba don ha ki kyrdan kiba kham rit Kane ka la pynkhuslai ia kito kiba shna ia ki polisi thymmai ha ka thong jong ki na ka bynta ka jingwanrah ia ki lad ka ioh ka kot kiba ryntih ia baroh ha baroh ki bynta jong ka ri.
Ha kaba iadei bad kane, ar tylli ki skhim kiba long ka PM Jan Dhan Yojana bad ki jingai ram MUDRA ki la pynkylla khait ia ki kam ban ai bynta ia baroh ha ki kam pisa, ka jingthep pisa bad ka jingai ram ha kane ka ri ha ryngkat ka jingkular na ka bynta ka jinglaitluid kaba thymmai ha ka jingseng kam lajong ha ka ri.
Ha kine ki hynniew snem ba la dep, ki Bank baroh ki la pyllait haduh 35.32 klur ki jingai ram MUDRA kiba kot sha ka T 18.4 lak klur kaba long kumba T 52,000 ki jingshim ram na ka bynta kito kiba shim ia ki ram kiba rit.
Kumba ar na ka 3 bynta jong kine ki jingshim ram ki dei na ka bynta ki longkmie kiba seng kam lajong. Da kaba antad ba man ka kam ka plié lad ioh kam ia kumno kumno ar ngut ki briew, lah ban shu ong hangne ba kine ki kam ki ai ki lad kamai jakpoh ia palat 10 klur ngut ki briew.
Ka Sorkar, da kaba sngewthuh shai ia ki jingdonkam jong kito kiba duna khyndiat ha ka jingshemphang ha ki kam pisa bad kiba stad bha ha ki kam khaii bad kiba don ia ki jingthmu ban kiew shaphrang, ka la wanrah lai tylli ki thup jong ki jingai ram MUDRA ban pynbeit ia ki jingdonkam jong ki jait nongseng kam bapher bapher kiba long ka SHISHU, TARUN & KISHOR.
Ka nongrim jong kane ka long ba katba dang iaid ka por, ki nongshim ram SHISHU kin ym sah beit ha ka thup SHISHU, kin kiew sha ka thup TARUN bad ki nongshim ram TARUN kin kiew sha ka thup KISHOR bad kane, katba dang iaid ka por kan wanrah ia ka jingryntih ha ka jingriewspah!
Hynrei, ka Sorkar ka la hap pynbeit shibun ki jingeh hadien u snem 2014. Kam shym la don ka rukom treikam kaba plié lad. Ym shym la don ki jingdon jingem ban kyrshan ia ki kam kiba heh kiba donkam ban leh. Ka Sorkar ka la pynbeit ia ki rukom treikam ba iaid kam ha kato ka por da kaba wanrah ia ka jingshaniah.
Ka Sorkar ka la pynshlur ia ka jingseng kam lajong lyngba ki kam kiba shai bad kiba heh haduh katta katta kiba ym pat ju iohi mynshuwa. Ki la don ki lad ban kiew shaphrang ha ka jingpynmih pisa hynrei ki briew kiba bun kim pat sngewshngain ba ki kam ba ki seng kin ioh jingkyrshan ne em na ki bank.
Ka jingseng ia ka guarantee trust (CGFMU) da ka Sorkar ka la pynthikna ba ki bank bad kiwei kiwei ki kynhun kiba donkti ha ki kam pisa ki sngew shngain ban ai ram. Ki jingai ram kiba kot haduh T 10 lak mynta ki don ka jingkyrshan jong ka Federal Government-sponsored Trust.
Ki nongai ram ki sngew shngain ruh ban ai ram khlem da phah buh bynda. Shen kane ka la long kaba saphriang sha baroh ki kam ha kaba ki briew jong ka ri ki la lap ia ki lad ioh ram khlem kano kano ka jingeh!
Ka Sorkar ka la pyndonkam ruh ia ka teknoloji ban peit ia ki kam. La wanrah ia ki Banking Correspondent ban kyntiew ia ka jingpdiang ia ka skhim bad ban ai jingtip sha ki briew shaphang ka skhim bad ki bynta jong ka.
Ki don shibun ki khana shaphang ka jingpynkupbor ia ki briew lyngba ka skhim MUDRA. Bun na kine ki dei shaphang ki longkmie kiba shim ram bad kiba la kylla mynta sha ki nongialam ha ka jingpynbiang ia ki jingdonkam jong ka longiing bad ki nongai kam ia kiwei kiwei ki longiing.
Ki la pyllait ialade na ki jingteh jong ki nongai ram bad ki la kyntiew ia ka jinglah shim ram jong ki na ki bank. Ki nongioh jingmyntoi kiba long ki longkmie ki long ar na ka lai bynta jong baroh kiba shim ram MUDRA bad bun na kine ki dei kiba wan na ki longiing kiba shem jingeh shisha hynrei mynta ki la pynkylla khait ia ka jinglong jong ka imlang sahlang ha ka ri.
Kine ki jingjop ki pynkynmaw ba ki kam kiba rit, kiba iaid lyngba ki jingeh ki don beit ka lad ban kiew shaphrang. Ym shym la don kano kano ka jingeh kaba la pynlong ia ki ba kin duh mynsiem.
Ka ri ka la iohi ruh ia ka mynsiem ba shynrang ha ka jingseng ia ki kam lajong ha ka por jong ka khlam COVID. Ki don katto katne ki riewshemphang ki ba la ong ba kane kan wanrah ia ka jingban khia ha ka jingim ia ki ram kiba jynjar ban siew. Hynrei, ka kam ka la lah ban iaineh ia kine ki jingeh khlem da don jingktah ei ei.
Ka Sorkar ka la bteng ban kyrshan ia kine ki briew kiba shlur kiba la kloi ban kyrshan hi ialade. Ka Sorkar ka la wanrah ruh ia ka jingpynduna 2% ia ka sut khnang ban pynsting ia ka jingban khia jong ki nongshim ram bad kane ka dang bteng haduh mynta.
Ki kam digital ha India ki la pynkylla khait ia ki kam pisa jong ngi. Mynta, ka India ka don ia ka rukom treikam kaba la pynbeit, pynryntih kaba iarap ia ki briew ba kin pyndonkam ia ka app jong ka bank ban ioh shim ram da kaba shong ha iing.
La wanrah ia ki lad ba thymmai ha kaba ki NBFC bad ki kynhun ba ai ram kiba rit ki iatrei lang bad ki Bank, RRB ban ai ia ki ram MUDRA. Ki kompani ki la ioh ia ki lad ba thymmai. Ki kam baroh ki la kiew ha kaba shi tyngka ban ai ram ka iarap kham bun mynta ha ka ioh ka kot.
Ki don ki social security kiba la pyniasoh na ka bynta ki nongshim ram bad ki longiing jong ki kiba ym pat ju mutdur mynshuwa! Katba ngi dang jam shakhmat, ki don katto katne ki skhim Sorkar na ka bynta ka bha ka miat bad ki skhim ban kyntiew ia ki kam rep bad ki MSME kiba lah ban pyniasoh kham bha bad ki skhim MUDRA, ha ryngkat ki lad ban pyndonkam kham bha ia ka fin-tech bad ki start-up ban wanrah ia ka roi ka par kaba pura bad kaba long salonsar.
Ka MUDRA ka dei ka jingjop kaba pyni kumno ka jingkut jingmut ha ki kam sain pyrthei ki lah ban iakynduh ia ki jinglong jingman ha ka imlang sahlang ban wanrah ia ka jingkylla kaba bha, kaba iaineh bad kaba ryntih. Ngi ngeit ba kane ka dei tang ka jingsdang jong ka AMRIT KAAL na ka bynta ka India kaba seng ia la ki jong ki kam bad kaba shaniah ha lade.(PIB)
