New Delhi, Jymm
ang 05: Kum shibynta jong ka kynhun shipai duriaw jong ka Ri India ban pynkhlain ia ka jingiadei bad kiwei ki ri ha Mediterranean sea ka sep ngi jong ka dewbah Africa, ar tylli ki liengiapom jong ka Ri India kila poi mynta ka sngi ha Alexandria jong ka Ri Egypt.
Kine ki ar tylli ki liengiapom jong ka Ri India, ka wei ka dei ka INS Mumbai bad kawei ka INS Aditya, nalor ki kam kiba ia dei bad katei ka ri ha kine ki lai sngi kin ruh shibun ki jingiakynduh ha pdeng ki para shipai duriaw jong kine ki ar tylli ki Ri bad kane kan dang wanrah shuh shuh ia ka jingiadei ha pdeng kine ki ar tylli ki ri ha ki por ki ban dang wan.
Ka Ri India bad ka Ri Egypt ki long ki ar tylli ki ri kiba la slem bha kiba la kiew ha ka imlang sahlang bad ki don la ka jong ka jong ka khana parom bad kine ki ri mynta ki don ka jingiajan ha kiba bun ki liang kham tam eh ha ki tiar ia pom ha kaba ki shipai suin jong ka Ri India ki hikai ia ki shipai suin jong ka Ri Egypt bad kaba khraw eh mynta ka long ba kine ki ar tylli ki ri ki ia treilang ban shna ia ka liengsuin iapom ia kaba la ai kyrteng ka “Helwan 300 Fighter Jet”.
Ka jingdon ia ka Joint Defence Committee hapdeng kine ki ar tylli ki ri ia kaba la ia soi ha u snem 2006 ka dei kawei pat ka lynti ban dang pynkhlain shuh shuh ia ka jingiadei hapdeng kine ki Ri. Haka khaii pateng hapdeng kine ki ar tylli ki Ri kala dang khlain ha kaba bun ki kompeni na India ki kwah ban leit seng kam sha katei ka Ri.
Kin ki lieng ia pom jong ka Ri India kiba la poi sha katei ka Ri ki dei na ka Indian Navy’s Western Naval Command bad ka ktem jong ka ka dei na Mumbai. Ia kane ka kynhun la iala da Rear Admiral RB Pandit, u Flag Officer Commanding Western Fleet, u ba la leit lang bad ka lieng iapom ka laba lah ban kdew bad thew ia kaba la tip kum ka “missile destroyer, INS Mumbai”.
