Shillong, Jymmang 26: katkum ka jingjubab jong u C W Momin Chief Engineer jong ka National High Way ia ka RTI ba la pan da u president jong ka Hynniewtrep Youth Council (HYC) jong ka Mathad raishan ha ka 14 tarik jong u bnai Lber mynta u snem kala kren shai ba ka jingthmu ban shna ia ka surok na Nongstoin sha Domiasiat haduh Mawthabah ka jingthmu jong ka, ka long na ka bynta ban tih Uranium.
Haka kyrwoh kaba la phah da ka seng HYC kaba la soi da u bah Nickson Dohling ka pynsngewthuh sha sha ki paidbah ba ka jingthmu bn pynheh ia kane ka surok ka long ban tih ia u Uranium kaba don ha katei ka thain, kane ka jingshna pynheh ia kane ka surok ka long ban pynsuk ia ka leit ka wan jong ki kali ka company UCIL.
Ka HYC ka ong ba ka jingkam jong ki katto katne ngut ki seng bhalang, ki rangbah shnong kiba dei na ka South West Khasi Hills District ba kan long ka jingkyrkhu ia ki paidbah ka tei ka thain ka dei ka jingshah ialam bakla , kane ka dei ka buit poh jong ka sorkar pdeng da ka jingiatreilang bad ka sorkar jylla kaba la ialam da ka seng Congress.
Ha ka juh ka por ka HYC ka buh ruh ka jingkylli ia ka tand shna surok jong ka sorkar pdeng ia kaba la tip kum ka Ministry of Road And High Ways kan leit shna surok kyrpang sha katei ka thain lada kam don ka jingthmu ban tih Uranium, la da dei na ka bynta ka roi kapar la dei ban shna ia ka surok na Nongstoin Sha Maweit, Borsora, Ranikor kine ki dei ki surok ba don kam.
Kaba pynlyngoh ka long ba kane ka sorkar MUA, ka sngap jar jar ha kaba ia dei bad kane ka bynta , kahmtam u MLA ka Mawkyrwat ubah Rowell Lyngdoh bad u Martin M Danggo kiba dei ki MLA kane ka thain. La ong ba ka HYC kam pyrshah ia ka roi ka par . Haba ia dei bad kane ka surok ka HNY da lei lei kan nym lah ban pdiang, ong ka kyrwoh kaba la phah da katei ka seng.
