New Delhi, Jylliew 10: Ki kam bording jong ka India ki la mad ki jingkyla kiba khraw, kiba thmu ban pynbiang bording kiba shngain, kiba jemdor bad kiba iaineh sha ki briew. Ha ki 9 snem ba ladep la shim katto katne ki sienjam ban kyntiew ia ki jinglah pynmih bording.
Ka jingpyniair ka jingioh ia ka bording, ka jingkyntiew ia ka jingpynmih bording na ki tyllong ba lah ban pynthymmai bad ka jingpyntreikam ia ki polisi kiba kyrpang. Hangne ngi peit ia ki jingjop kiba ai mynsiem bad ki sienjam kiba la wanrah jingkylla kiba la kyntiew ia ki kam bording jong ka India.
Ka jingiaid lynti ka India sha ka lawei kaba kham khuid kadei kaba la ioh jingithuh na baroh kawei ka pyrthei. Da ka jingwanrah shuh shuh palat 175 GW ka jinglah pynmih bording ha kine ki khyndai snem ba ladep, ka India ka la kylla na ka ri kaba duna bording sha ka ri kaba pahuh bording.
Ka jingtrei shitom jong ka ri na ka bynta ki tyllong pynmih ba lah ban pynthymmai ka don ka bynta kaba khraw ha ka jingpynurlong ia kane. Ka jingkiew shaphrang ha ka jinglah pynmih bordingna ki tyllong solar bad na ki lyer ka la pynskhem ia ka kyrdan jong ka India kum ka nongialam ha ka jingpdiang ia ka bording ba lah ban pynthymmai.
Mynta ka India ka don ha ka kyrdan kaba saw ha ka pyrthei ha ka jinglah ban pynmih bording na ki tyllong ba lah ban pynthymmai ha kaba 43% jong baroh ka jinglah pynmih bording ka wan na ki tyllong ba lait na ki fossil fuel.
Ka jingieng skhem ka India na ka bynta ka jingpynmih bording bad ka jingpynioh bording ia baroh ka la wanrah ki jingkylla. Ka Pradhan Mantri Sahaj Bijli Har Ghar Yojana (SAUBHAGYA) kadei ka dak jong ka jingjop ka jingpynpoi bording sha baroh ki iing ba lah pynbiang ia ki jingdonkam ha man ka shnong bad ki distrik jong ka ri.
Kane ka prokram ka la pynbiang bording sha ki 2.86 klur tylli ki longiing bym ioh bording naduh ka 25 tarik Nailur 2017 ha ki jaka nongkyndong bad jaka sor.Ka International Energy Agency (IEA) ka la ong ba kane kadei ka jingpyniar kaba sted tam ha ka pyrthei ha kaba iadei bad ka bording.
Ka jingioh ia ka bording ha ki jaka nongkyndong bad jaka sor ka la kiew bha ha kaba ki jaka nongkyndong ki la ioh mad ia ka jingkiew kaba kumba 12 kynta shi sngi ha u 2014 sha ka 22.5 kyntaha ka shi sngi mynta ha kaba ki jaka sor ki ioh bording jan 24 kynta shi sngi.
Ban pynbha shuh shuh ia ka jingpynpoibording sha ki jaka nongkyndong, la sdang ia ka DeenDayalUpadhyaya Gram JyotiYojana (DDUGJY)ha u 2014. Ka prokram DDUGJY ka la pynbiang bording sha baroh ki shnong ha ka 28 tarik Iaiong, 2018.
Da kaba pynpoi bording sha 18,374 tylli ki shnong ki bym ioh bording, ka jingpynkhlain ia ka rynsan pynpoi bording bad ka jingpynthikna ba ka bording ka poi sha baroh ki jaka nongkyndong jong ka India.
Ki sienjam jong ka sorkar ban kyntiew ia ka jingtyngkai ia ka bording ruh ki la long kiba jop. Hapoh ka skhim UnnatJyoti by Affordable LEDs for All (UJALA), ka dor jong ki bulb LED ki la hiar da kumba 90% hapdeng u 2014 bad 2019, na ka T. 310 sha ka T. 39.90. Haduh mynta, ladep sam palat 36.86 klur ki bulb LED hapoh ka skhim.
Kane ka sienjam ka la pynduna ka jinglut jingsep jong ki longiingna ka bynta ka bording bad ka la kyntiew ruh ia ka jingshna ia ki bulb LED hapoh ka ri kaba kyrshan ruh ia ka “Make in India” campaign.
Namar kane, ka India ka la ioh mad ia ka jingpdiang ia ki rukom wanrah jingshai kiba tyngkai ia ka bording bad kane ka la wanrah ia ka jingpyndonkambording kaba kham duna bad ka mariang kaba kham khuid.
Ban pynbha shuh shuhia ka rukom pynpoi bording, ka sorkar ka la pyntreikam ia ki sienjam kum ka Restructured Distribution Sector Scheme (RDSS). Ka RDSS ka la pynduna ia ka jingduhnong jong ki DISCOM, na ka 21.5% ha u snem mang tyngka 2020-21 sha ka 16.5% ha u snem mang tyngka 2021-22.
Kine ki sienjam kiba peit ia ka jingpynduna ia ki jingduhnong, pynbha ia ki kam kiba iadei bad ki meter bad ka jingpynbiang ia ki jingdawa ki la kyntiew ia ka jingiaid ryntih jong ka Grid bad ka la plie lad ia ki briew ba kin pyniaid ia ka rukom pyndonkam bording da ka jingsngewthuh kaba shai.
Ka jingkylla jong ki kam bording ka India naduh u snem 2014 ka dei ka khana jong ka jingiaid shaphrang bad ka jingskhem jingmut. Lyngba ki jingjop kum ka jingpynpoibording ia baroh, ka jingpyniar kaba sted jong ka bording na ki tyllong ba lah ban pynthymmai.
Ka jingkyntiew ia ka jingpynpoibording bad ka jingtyngkai ia ka bording, ka India ka la buh ia ka nuksa ba ai mynsiem ia ka pyrthei. Ka jingskhem jingmut jong ka sorkar India, ha ryngkat ka jingiatreilang jong kito kiba don bynta ha kine ki kam ka la kyntiew ia ka ri sha ka lawei kaba ioh bor na ka bording kaba iaineh, kaba jemdor bad kaba shngain.
Katba kane ka jingiaid lynti ka dang bteng, ki jingbei tyngka, ki jingsaindur thymmai bad ka jingiatreilang kin iarap bha ban pynkhlain shuh shuh ia ki kam bording jong ka India bad ki jingpynthikna ia ka lawei kaba phyrnai na ka bynta ki briew jong ka ri.
