Shillong, Jylliew 12: U Publicity Secretary jong ka seng lehnoh ka Hynniewtrep National Liberation Council (HNLC) u Bah Sainkupar Nongtraw ha ka khubor kaba la phah sha ki lad pathai khubor mynta ka sngi la ong ba ka seng HNLC ka long kaba la kloi ban ia kren ia suk lada ka sorkar pdeng ka khot.
Ha ka kyrwoh kaba la phah mynta ka sngi, la ong ba ka kila seng ia kane ka seng 29 snem mynshuwa halor ka nongrim bad dei halor ka nongrim ba ki sa ieng ban ialeh, u sainkupar u la ong ba kiwei ki seng lehnoh ki la mih khlem kano kano ka nongrim bad kane kala pynlong ia ki ba kin suk ban pyndem wait.
Halor ka jingkynthoh jong u Myntri rangbah, na ka liang jong ka seng HNLC ka ong ba kane ka jingkren ka dei ka kam kren khyllung khynnah suda tang namar ba ym kwah ban poi sha ka jingiakren ia suk bad u kwah ban shu pyni ba u dei u khliehduh jong ka sorkar MUA II.
Ka seng HNLC ka ong ba ka pynpaw ia ka jingsngewnguh ia u nongialam ka HNYF u Bah Sadon Blah, KHNAM youth wing President Bah Thomas passah, KSU bad UDP’s MLA bah Embhah Syiemlieh ba kila pynpaw ia ka jingsngew ka jong ki ia ka jingle bym suid niew jong u myntri rangbah ia ka jingkwah ia kren ia suk jong ka seng HNLC, ha ka juh ka por ka buh ka jingkylli ba lei ki MLA na Khasi-Jaintia ki sngap jar jar.
Ka jingpynlong ia ka jingpdiang burom ia ki seng lehnoh ANVC, ANVC(B) bad UALA ka long ban pyni ba dei tang ki seng lehnoh na Garo Hills kiba lah ban ia soi ia ka sorkarkular ia suk bad u myntri rangbah, ha ka juh ka por ka seng HNLC ka pynkynmaw ia kaei kaba u PA Sangma bam kwai ha dwar u blei u ong kumno. Ka long kaei kaei kaba sngewlyngoh ban iohi ba u myntri rangbah u ong ba ki HNLC ki dei ki seng lehnoh bad ha ka juh ka por u kyntait ban ia kren ia suk.
Kumba ka long u myntri rangbah u la ia soi ia ka soskular ia suk bad ki seng lehnoh na Ri Lum Garo, mynta ka dei ban shai sha ki paidbah ka Khasi-Jaintia ba u myntri rangbah u kwah ban don ka jingsuk, mynshuwa kim da shimkhia ia kane ka jingiakren ia suk namar ka jingshim stieng ia u myntri rangbah ka jylla. Ha ka juh ka por ki buh ka jingkylli ruh balei ka myntri kam poh iing ka sngap jar jar nhalor kane.
Ka seng HNLC ka pynkynmaw ba dei halor ka jingkular jong u myntri rangbah bad ka myntri kam poh iing kiba la kular ban thung ksiang, hynrei kumba ka paw mynta kila shah pynbiej ha ki bad kane kala wanrah ia ka jingbitar, lada ka long kumne kumno ka jingsuk kan wan ha ba ki nongialam ki long kiba thok ba jler la kynnoh ka seng HNLC.
Mynta ki don ka jingkyrmen mynta ha u myntri rangbah duh jong ka Ri bad ha u myntri khynnah ka sorkar pdeng u Kiran rijiju ba kin pynbeit ia kane ka jingeh, dei halor kane ba ki khlem khot pakhang shnong ha ka Independence Day ban pyni ba ki kwah ban ia kren ia suk wat la u myntri rangbah ka jylla u kren kumno kumno ruh.
U Bah Sainkupar u la ong ba ka seng ka ieng skhem ha ka nongrim kaba ki don, kin nym pyndem wait wat la ka long ha kano kano ka dur ruh. Lada ka sorkar pdeng ka long kaba la kloi ban ia kren ia suk na ka liang jong ka seng HNLC ruh kalong kaba lakloi ban ia kren ia suk, ong u Bah Sainkupar Nongtraw ha kyrwoh kaba la phah sha ki kot khubor mynta ka sngi.
