Shillong, Rymphang 8: Ka Shad Suk Mynsiem kaba ar sngi ka Seng Khasi Ri-Raid Laban, la sdang ia ka mynta ka sngi ka 8 tarik u Rymphang 2025 ha maan jong ka skul Shillong Vidyalaya, Lum Shatsngi.
Kum ban shu pynkynmaw ba kane ka Shad Suk Mynsiem kaba la sdang mynta ka sngi, ka dei ka sien jam ba nyngkong ba ka Jylli Pyrkhat jong ka Seng Khasi Ri Raij Laban ka la shim ia ka rai ban pynlong ia ka, katta naduh ba la sengi a ka ha u snem 1981.
La sdang ia kane ka shad ka kmen, da ka jingiamih paidbah ki nongshad na iing seng kaba don ha Lumsohphoh, Upper Lumparing, ha kaba ki nongshad shynrang, ki duhalia bad ki parakur parakha ki la iaid da kjat haduh ban da poi ha ka lympung shad.
Ha shwa ban sdang ia ka shad ka kmen, ka la don shwa ka nguh ka dem ka shat ka khein kaba la pyndep da u Riew Tymmen Riewsan ka Seng Khasi Kmie, u Rgh Skor Jala, ia kaba la pynbud da ka jingkyntiew pat ia ka lama ka seng da u Rgh . I Sun President ka Seng Khasi Ri Raij Laban bad hadien kane la pynbud pat sa ka shad ka kmen, ba la wan ban iashim bynta shitrhem bad pynphuh pynphieng da ki thei sotti ki rang samla lem bad ki hep barit.
