Shillong, Naitung 11: U Nongialam ka liang pyrshah hapoh ka iing dorbar thawaiñ ka jylla u Dr Donkupar Roy, u ba dei ruh u president jong ka UDP, u la pynkynmaw ba ka sorkar kala dep ban aiwai ia ka Kylleng Pynden Umiong sha ka Uranium Corporation India Limited (UCIL) na ka bynta 30 snem ha u snem 2010.
Ha ka juh ka por, u Dr Donkupar u la ong ba ka sorkar pdeng kam lah ban tih ia u marpoh khyndew khlem da ioh ia ka jingbit na ka sorkar jylla. Na ka liang jong ka seng UDP ka dawa na ka sorkar bad ka UCIL ba ka dei ban pynshai paidbah la kan don ne em kata ka jingktah ia ka koit ka khiah lada tih Uranium.
Haba ia dei bad ka nongrim ba ka seng UDP ka iing halor kane ka kam Uranium, ka long ba ki kwah ia ka jingpynshai paidbah bad kiei ki lad ki lynti jingiada lada tih Uranium, ka seng ka kwah ban iashai shuwa ba ka sorkar ka dei ban jam ia kane ka kam sha khmat. Ka seng kam kwah ban iohi ba ka jingthih Uranium kan iaid sha khmat khlem da ioh ia ka jingpynshai kaba biang bad ban pynthikna ba kan nym don kano kano ka jingktah.
Halor ka EOI, kaba la khot da ka UCIL, u Dr Donkupar u la ong ba ka sorkar kala dep ban aiwai sha kane ka Company, ka la dei ka bynta jong ka UCIL ban kan leh ia kaba don kam, hynrei kan nym lah ban tih pat khlem ka jingbit na ka sorkar jylla.
