Shillong, Rymphang 05: Ka Seng Nongsumar Dawai Khasi Nylla dang shen kala wan ban ia shim bynta ha ka jingialang kaba la long ha ka nongbah Delhi, ia kaba la khot da ka National Council Philosophical Ashram All India (NCPAAI) ha kaba bun bah ki nongsumar tynrai na kane ka dong sha tei lam mih ngi jong ka Ri India kila poi sha kane ka jingialang.
Ia kane jingialang la plied a u myntri khynnah ka sorkar pdeng u ba dei iaka koit ka khiah u Faggan Singh Kulaste. Ha ka jingkren plie ka jong u u la ong ba ka long kaei kaei kaba don kam ban pynneh pynsah bad pynkhlian ia ka rukom sumar tynrai ha kaba ia dei bad ka koit ka khiah namar kane ka rukom sumar ka dei kaba ki briew ki da ioh pateng bad kane ka rukom sumar kala long da ki hajar snem mynshuwa.
Na kane ka jylla Meghalaya kiba la poi ban ia shim bynta ki long lai ngut, na Khasi Hills la mih khmat da ka Seng Nongsumar Dawai Khasi Nylla, ia kaba la mih khmat da u Bah S Nongrem, na Jaintia Hills la mih khmat da u Bah H C Pakyntein bad na Garo Hills la mihkhmat da u Meril Sangma.
Haba phai sha ka jylla Meghalaya u Dr H Bani u ba dei ruh u shah khot kyrpang jong ka State Biodiversity Board jong ka jylla Meghalaya u ba dei ruh u nongai buit rangbah jong kane ka seng nongai dawai khasi u la ong ba ka sorkar jylla kam shym la shim khia ia kane ka kam ban kyntiew ia kane ka rukom sumar tynrai.
La ong ba kane ka rukom ai dawai khasi, ka seng kala iaid sha khmat ban pynsngewthuh ia ki paidbah ban kyntu ia ki paidbah ban pynneh pynsah ia ki khlaw ki betap na ka bynta ban pynneh pynsah ia ki dawai kynbat.
La ong ba ha kiwei ki jylla jong ka Ri India ki sorkar jylla ki long ki nongprat lynti bad ha ba ki phah ia ki briew sha ki jingialang kiba heh ki sorkar jylla ki da phah ruh ia ki briew jong ki ban long ki nongpynshai ia kaei kaba ki nongsumar ki kren ha ki jingialang bad ki sorkar jylla ruh ki da pynlut ia ka jingleit jingwan ka jong ki.
Kaba sngewsih ha kane ka jylla Meghalaya ka long ba ka sorkar jylla kam shym la shim khia ha kaba ia dei bad kane ka kam, ka ei kaba ka seng ka leh ka long kala shim hi ia ka jingkit khlieh ha kaba ia dei bad ka jinglut jingsep namar ba ka sorkar jylla kam shym la lah ban ai jingiarap kumba long lem kiwei ki jylla.
