Shillong, Naitung 22: Ka sorkar Meghalaya kan nym shah ia ka Uranium Corporation of India Limited (UCIL) ba kan leh ia kino kino ki kam pynroi ha kaba ia dei bad u Uranium, ha katei ka jaka ba don u Uranion hapoh jong ka South West Khasi Hills District, lada kam pat lah ban pynshisha ia ki lad ai jingida ia ki briew ha ka liang jong ka koit ka khiah bad kaei ka jingmih kab lah ban jia da ka jingtih Uranium. Kane ka long ka nongrim kaba ka sorkar ka ieng bad ia kane la pynpaw ha ka jingialang kaba la long mynta ka sngi bad ki sengbhalang ha secretariat.
Kiba bun ki seng bhalang kila pynpaw ia ka jingsngew pyrshah ha kaba ia dei bad ka jingthmu ban shna ia ka surok ba kah ban iaid kali ar tylli na Nongstoin-Pambriew-Wahkaji-Mawthabah kaba dei na ka skhim SARDP-NE, bad kane ka jingpyrshah ka long halor ka nongrim ba kajingthmu ka long ban khlang ia u Uranium na katei ka jaka, ki nongialam seng bhalang kiba la ia poi sha kane ka jingialang ki long ka NESO, KSU, JACSO, JAC, bad kiwei kiwei kum juh ki trai shnong na ka thain Mawthabah-Wahkaji, kine ki ong ba ki kwah ia ka surok hynrei ki pyrshah ia kajingtih Uranium.
Haba kren ha ki nongthoh khubor ha dien ba la dep ka jingiakren bad ki seng bhalang, u myntri rangbah u la ong ba ka sorkar kala trei shitom ban pynioh ia kane ki skhim na ka “Special Accelerated Road Development Programme” na ka bynta ka dong hsatei lam mih ngi jong ka Ri India (SARDP-NE) bad ia kine ki surok yn nym lah ban pynwan sha kaba tih Uranium.
U myntri rangbah la ong ba ki briew kimd ei ban pynsngewthuh bakla ba ka jingshna ia kine ki surok kiba lah ban iaid ar tylli ki kali ban long ka jingsdang ban poi sha ka jingtih Uranium, namar ba ka sorkar haduh mynta kam pat shim kano kano ka rai ha kaba ia dei bad kane ka kam, ka sorkar kan nym leh bakla, lada kam pat don ka jingiamynjurlang kane ka sorkar kala sngewthuh shai kdar ia kane ka phang.
Ia kane ka kam shna surok wat juh pyniadei bad ka jingtih Uranium ha kane ka jylla, kajingthmu jong kine ki surok ka long ban pyniasoh ia ki surok ha kane ka jylla bad kiwei kiwei ki surok ki surok jong ka jylla bad ba kin ia kynduh bad ka surok bah “East-West corridor”, bad ban pyniasoh bad baroh ki District headquartersbad ki surok bah, ha kane ka jingiakren la kyrpad ia ki seng bhalang ba kin nym pyrshah ia kine ki surok bad bay m dei ban duh ia ki namar kane ka dei ka lad ia ka jylla ban kyntiew ha ki kam surok.
Na ka liang jong u myntri rangbah ruh u la pynpaw ia ka ei kaba lah ban mih na ka jingtih Uranium, hynrei ha kaba ia dei bad kane ka don lad ban iada katkum ka stad saian kaba mynta, la kyntu ia ki seng baroh kiba la ia poi sha kane ka jingiakren mynta ka sngi ba kin dei ban sngewthuh bakla ba ka UCIL kan tih Uranium lada shna ia ka surok, la ong ba ki don ki ain ban iada ia ka khyndew bad ia ki paidbah, la kyntu ba kim dei ban shim lypa ia kano kano ka rai namar ka sorkar kan dang iaid bteng ban khot ia kum kine ki jingiakynduh lang ban ia mir jingmut na ka por sha ka por halor kane ka phang.
Haba ia dei bad ka EOI kaba la khot da ka UCIL, ka sorkar jylla kan sa thoh sha kane ka company jong ka sorkar pdeng ba ka dei ban buh teng noh shuwa ia ka, bad ia ka rai jong ka sorkar ban ai jaka 422 hectar sha ka UCIL kaba la shim ha ka 24 tarik Nailar jong u snem 2010 ka sorkar kala pyndam noh , ban ia shai shuh shuh halor kane ka surok ka sorka jylla kan thoh sha ka tand shna surok jong ka sorkar pdeng ba kan pan jingpynshai shuh shuh.
Kiwei ki myntri sorkar kiba la ia don ha kane ka sngi ki long u Bah Prestone Tynsong, ka kong Roshan Warjri, ka kong Ampareen Lyngdoh, Clement Marak, u Chief Secretary u KS Kropha bad bun kiwei ki heh sorkar kila ia don lang.
