Shillong, Lber 06: Ka Jaintia Youth Federation (JYF) Sengkmie, kaba iai peitngor na ka por sha ka por ia ka rukom treikam ki tnad sorkar bapher bapher ha Ri lum Jaintia, kam lah khlem da ai ka jingiaroh bad ka jingkhublei ia ka tnad PWD kaba peit ia ka jingbha bad jingkylluid u surok haba wan ba leit ki jait kali baroh hapoh ka Ri.
Ka jingshimkhia jong ki bor ba halor naduh u myntri ba dei peit ia ka PWD, ki Officer ka tnad PWD bad khamtam u Deputy Commissioner ka West Jaintia Hills District, kiba la trei shitom ban pyndep hapoh ka por ba dei biang na ka bynta ban pynkylluid ia u surok NH-44 lane Jowai By pass uba iaid lyngba na saw mer bad mih shaduh Orchin in, Mukhla.
Ka JYF ka ong kam la khlem da iaroh ia kane ka jingtrei shitom jong ka tnad PWD, ha ka ban wanrah ia ka jingkylluid bad jinglaitluid haba leit ba wan bad khamtam kaba la sakhi da ki phew hajar ngut ki paitbah kiba la ia wan sha ka jingiaseng Synod kaba la long ha Mihmyntdu.
Ka jingdon jong kane ka surok by pass, ka la iarap shi katdei eh ia ki kali heh kiba iaid na silchar shaduh Guwahati, namar kim donkam shuh ban rung lyngba ka sor Jowai kumba mynshuwa, kane ruh ka dei kawei kaba la iarap bha ia ki pulit pyniaid kali ban kham sting ka kam, khnang ba kin ioh lad bha ban pynleit jingmut ia ka jingiaid ryntih ki kali rit ba kamai hapoh sor Jowai ong u samla Firmly Rymbai Genal Secretary ka JYF Sengkmie.
Shuh shuh ka JYF ka ai mynsiem bad iaroh ia ki officer kiba shimkhia ban pyndep hapoh ka por ka ba biang bad kumjuh ruh ia u Contractor uba la trei shitom ban duriap ia ka kam ba bha na ka bynta ka jingmyntoi jong ki paitbah nongshong shnong ka Jylla.
Kumjuh ruh ka long ka jingshngain ia ki khynnah skul kiba leit skul wan skul lyngba kane ka surok, naduh ba ki kali heh kim ioh lad shuh ban iaid lyngba ka sor Jowai, ka la long shisha ka jingkyrkhu kaba lait na ki jingsyier ia ki khynnah skul naba ka jingstad ki officer ka tnad PWD ban pyndep ia ka surok by pass ha ka por ka ba dei, ka long ka ba dei eh ban iaroh ia ka jingtbit jong ki pynkut u kyrwoh na ka JYF.
