Shillong, Kyllalyngkot 10: Ka Lawlynnong Sports Club Mynsang ha ka 7th Kyllalyngkot 2017 ka la pynhap pyrda noh ia ka Final Football ha ka jingialng kaba iphuh iphieng ha kaba la wan ban sakhi da ki spah ngut ki paidbah nong shong shnong naduh ki Longkmie longkpa, ki riew rangbah jong ka Thain Mawkynrew Constituency, ki hun samla lem bad ki hep kiba rit.
Ia kane ka Jingialehkai Football ka Ka Lawlynnong Sports Club Mynsang ka la pynlong kum shibynta ban kyntiew ia ka sap ialehkai jong ki khynnah samla bad kumjuh ruh kum shibynta ban hikai ia ki khun samla jong ka Thain ban pynlut ia ka por kaba kordor ha ki kam ialehkai sports ban kiar na ki jing mlien kiba sniew kiba pyntroin ia ka koit ka khia bad ia ka imlang ka sahlang hi baroh kawei.
Ki kynhun kiba la poi sha ka Final ki kynthup ia ka Umtong Sports Club pyrshah ia ka Mawdulop Sports Club ha kaba ka Umtong Sports Club ka la long ka kynhun Lahduh da kaba pynliem noh ia ka Mawdulop Sports Club da 1- 0 bad rah ruh ia ka song tyngka kaba long Rs.10,000/- (Shiphew hajar) katba ka Mawdulop SC pat kaba la shah jop ha ka jingiakhun Final kala ioh rah ia ka Song Tyngka kaba long Rs.5,000/- (San Hajar)
La pynphuh pynphieng ha katei ka sngi da ka jing iadon ryngkat u Bah Banteidor Lyngdoh, MDC Mawkynrew Constituency uba la long kum u Kongsan ha katei ka sngi. Haba kren kum u Kongsan na ka liang jong u Bah Banteidor Lyngdoh u la ai khublei kyrpang ia ki Nongialam jong ka Lawlynnong Sports Club Mynsang kiba don ia ka jing iohi jngai ban pynlong kum ia kine ki Jait Tournament ban kyntiew ia ka sap jong ki khun samla, ha kaba na ka liang jong u u la kyntu da kaba ong ba ka jingialehkai Football ka Hikai ia ka Jingiatreilang, ka Pynkhlain ia ka bor Pyrkhat bad ban don ia ka jingkut jingmut ban poi sha ka Thong ban ioh kheit ia u soh jong ka jing jop.
Nalor kiwei pat ki kynrem ki lyndan ha katei ka sngi la iadon ryngkat ruh u Bah Elisha Khongjoh, Secretary Lawlynnong Sports Club Mynsang, Bah Albinton Mukim Sordar Shnong lem bad kiwei de ki Riew pawkhmat jong ka Thain.
