Jowai, Jylliew, 27: Ka East Jaintia Marginal Coal Miners’ & Owners’ Assocation (EJMCM&OA) kawei na ki sengbhalang jong ki nongtih, bylla bad khaїi dewiong ka ba peit ia ka bha ka miat jong ki trai par dewiong, ki nong khaii bad ki nongbylla dewiong ba rit ba ria, ka pynpaw ia ka jingsngew khia kaba jur bha halor ka hukum ba jyndat jong ka NGT ban khang noh shisyndon tdam ia ka jingtih bad khaїi dewiong ha ka jylla Meghalaya kaba la ktah shi katdei eh iaka jakpoh jong ki lak ki lak ngut ki nongshnong shnong jong ka jylla Meghalaya kiba im jakpoh na ka kam tih bad bylla dewiong.
Ha u kyrwoh khubor ba la pyllait da u General Secretary jong ka EJMCM&OA, u Bah H Deolangki Dkhar, u la ong ba ka long kaba i sangsot mynta namar ba da ki phew hajar hajar ngut ki nongshnong shnong jong ka East Jaintia Hills District ki la sdang ban mad ia ka jingiapkhlam na ka daw jong ka jingshahtngan tang namar ka hukum khang tih bad khaii dewiong ba jyndat jong ka NGT. La ong shuh shuh ha u kyrwoh ba mynta ka jingshahthngan ki paidbah jong ka EJHD ka la sdang ban jia mynta bad ka jingkylli mynta ka long ba mano ban shim ia ka jingkit khlieh halor kane ka shah tngan jong ki paidbah nongshongshnong jong ka ka East Jaintia Hills na ka daw jong ka hukum jong ka NGT?
Lyngba une u kyrwoh, ka EJMCM&OA ka la ong ba ha ka jingshisha ka NGT, shwa ba kan khang ia ka jingtih dewiong ha ka jylla Meghalaya, ka la dei ban shim shwa ia ka jingbishar kaba khlem noh shilliang khmat na baroh arliang. Ka NGT ka dei ban sngewthuh ruh ba lada shu khang jyndat noh kumne ia ka jingtih bad khaii dewiong, da ki lak ki lak ngut ki nongshnong shnong jongka jylla Meghalaya kiba la im jakpoh ialade na kane ka kam tih bad khaii dewiong kin leit shano bad kin im kumno?
“Ha ka jingshisha shwa ba ka NGT kan pynmih ia kaba kum kane ka hukum, ka la dei ban hukum ruh shuwa ia ka sorkar India bad ruh ia ka sorkar Meghalaya ban wad noh shuwa ia ki lad ki lynti (Alternatives) ban ai kam ai jam ia kito baroh baroh ki ban sa shah ktah na ka jinghukum jong ka bad dei tang hadien jong kine kiei kiei baroh ba ka dei ban pynmih ia kaba kum kane ka hukum. Da ka jingleh jong ka kumne, ka mariang ruh kan ym iap, ki mynsiem ba kordor ruh kin ym iap. Baroh ar kin ia im ryngkat ryngkat”, ong u Bah H. Deolangki Dkhar
Ka EJMCM&OA ka la ong shuh shuh ba ka jingshim jyndat jong ka NGT ia kaba kum kane ka hukum da kaba bishar tang shilliang, ka la wanrah ia ia ka jingtim ia ki lak ki lak ngut ki mynsiem ba kordor ha ka jylla. Da ka jingmih jong katei ka hukum jong ka NGT, ka EJMCM&OA ka labuh ruh ia ka jingkylli ba hato ki lak ki lak ngut ki paidbah kiba la shah ktah na kane ka hukum jong ka NGT kim dei ki jingthaw ba kordor ne ki dei tang mar ki mata ki bym don jingim? Lada da ki lak ki lak ngut ki mynsiem ba kordor kin iap noh na ka daw jong ka hukum jong ka NGT, kan myntoi aiu kata ka mariang kaba khuid lada ym don ki mynsiem ba kordor ki ban shong ban sah ha ka? Hato ka sorkar kan long kaba beit haduh katta katta ban iapein ia ka ka jingim jong ki lak ngut ki mynsiem ba kordor na ka bynta ka kata ka mariang kaba khuid? Hato ka sorkar kam don lad shuh da kumwei pat khnang ba baroh ar kine, kin ia im ryngkat ryngkat?.
Ong shuh shuh ka EJMCM&OA ba satang katno eh ki phew hajar ngut ki nongshongshnong jongka EJHD kin dang lah ban im jynjar kume na ka jingshah thngan na ka daw jong ka hukum jong ka NGT namar ka ’newsniew ba shyrkhei ka la sdang mynta ban wan lynshop ia ka East Jaintia Hills bad ynda kane kan jia, ka jingiam briew ba shyrkhei bah ka bym pat ju jia koit ha Jaintia Hills ka la sdang ban jia noh mynta.
U Bah H Deolangki Dkhar u la ong ba ka EJMCM&OA kam lah ban shu peit tang da ki khmat ia ki phew hajar ngut ki nong East Jaintia Hills ki ba la sdang mynta ban mad ia ka jingkordit bah kaba khraw hynrei shen ha kine ki khyndeit sngi, ka seng kan sa shong pyrkhat bad wad ia ki lad ki lynti kumno ban iakhun ia la ka jong ka hok na ka bynta la ka jakpoh.(SP News)
