Shillong, Rymphang 20: Ka Khlieh Nongsynshar na ka Federation of Khasi States, ki la pynpaw ba ki la sngew donkam ban ia kynduh ia u Shri. Conrad K Sangma, Chief Minister Meghalaya khamtam haba u la pynpaw ba u long uba kloi ban ia kren lada don ki kyndon Annexed Agreement jong ka Instrument of Accession ki hap hapoh ka kyndon treikam jong ka Constitution Ri India.
Na ka liang ki Khlieh Nongsynshar ka Federation of Khasi States ki sngewdei ban buddien ia kitei ki jingkren u Chief Minister namar kitei ki kyndon ki don ka jingiadei bad ki ktah ruh ia ka jingpynbeit ia u pud u sam hapdeng ka jylla Meghalaya bad Assam.
Namar kumba ka long haduh kine ki sngi ki kyntien “Khasi States” ki paw tyngkrien paw bakla hapoh ka First Schedule jong ka Constitution Ri India bad don kam ban ia shai kiei kita ki Khasi States bad hangno kut bad sdang u pud ki “Khasi States”.
Kumta halor kitei ki phang bad kiwei kiwei, ka Dorbar Federation of Khasi States ka la pan por kyrpang na u Chief Minister, jylla Meghalaya ban ioh ia syllok bad ia kynduh lang ban ia kren bad ban ioh jingshai na ka Sorkar Jylla halor ki nongrim ia pynbeit ia u pud u sam khamtam halor katei ka jingdonkam ban pynbeit ia katei ka First Schedule.
