Jowai, jylliew 05: Ka seng Hynniewtrep Achik National Movement (HANM), Jaintia Hills Unit hadien ba ka la tokit bniah ka lap ba ka don shisha ka jingbyrngem shah u dkhot ka seng u bah Ency Shadap uba bat ia ka kyrdan Organising Secretary ka Jaintia Unit, ia kane ka jingmaham la lap lyngba ki SMS na uwei u briew uba la tip kyrteng kum u Loukas Rymbai na ka shnong Pamra East Jaintia Hills District.
Halor kane ka nongrim na ka liang jong ka seng ka pynpaw ka jingpynrem jur ia une u briew ba donkti ban maham majah bad pyntriem ia ka leit ka wan jong kiwei.
Ka seng ka kyntu jur ia ki bor jong ka ain ba ki dei ban kem bad pynshitom mardor ia une u briew ba donkti ha kum kine ki jait kam pyntriem khnang ba kine ki jingjia kum kine kin nym jia shuh hadien habud bad ha kaba ia dei bad kane na ka liang jong ka Khliehriat Police Station kila dep ban register case ia une u Loukas Rymbai hynrei haduh mynta kim pat shem la ioh kem satia ia une u briew.
Kumjuh ruh ka HANM Narpuh Circle ha kaba iadei bad ka jingshah byrngem ia u tei u nongialam jong ka seng HANM kala pynrem jur bad ha kajuh ka por ka kyntu ruh ia ki bor jong ka aiñ ba ki dei ban kem mardor ia u briew ba byrngem ia u, Pynkut ka khubor na u president ka seng u bah Shaniahlang Suchen.(SP News)
