Shillong, Rymphang 24: U Vice President jong ka seng UDP u Bah Alantary Dkhar u la kam ba ki don ki jingthoh ba ka party Congress ruh ka kwah ia ka Citizenship (Amendment) Bill, ia kane u la kren mynta ka sngi ha ki lad pathai khubor ban pynshai ia ka jingkam ka seng Congress ba dei ma ka kaba pyrshah ia ka CAB.
Haba kren ha ki lad pathai khubor mynta ka sngi ha iing sah jong u shongknor ka iing dorbar thawain ai jylla u Dr Donkupar Roy u Bah Alantary u la ong ba ka Assam Pradesh Pradesh Congress Committee (APCC) ha u snem 2011 kala shim ia ka rai hapoh ka kabinet, ban shah ia ki Hindu Bengalis Buddhists, Christians kiba shah ban bein ha Bangladesh bad ia kane u tei u nongialam ka UDP u la shim na ka jingkren jong u Anjan Dutta nongialam ka seng Congress.
Ban pyni ba ka seng Congress ka kwah ia ka CAB, u Bah Alantry u la ong ba ha ka 20th Iaiong 2012, U myntri rangbah ka jylla Assam ha kato ka por u la ai ia ka dorkhas sha u myntri rangbah duh jong ka Ri u Dr Monmohan Sing ha kaba u la kyrpad ban ithuh noh ia kito ki briew na Bangladesh kiba la phet sha India kum ki nong India ba pura.
U tei u nongialam ka UDP, u la pynskhem shuh shuh ia ka jingkam jong u ba ka Congress ka kawah ia ka CAB da kaba shim na kaei kaba la mih ha kot khubor India Today kaba la mih ha ka 17th Naitung 2014, ha kaba u myntri rangbah ka jylla Assam ha kato ka por u Tarun Gogoi u la kyntu ia u myntri rangbah duh jong ka Ri India u Narendra Modi ban wanrah iaka polisi ban shah ia ki phetwir Hindu na Bangladesh kiba la wan phet sha India.
U Bah Alantry u la ong ba ym dei tang ka Congress na Assam, hynrei ka Punjab Congress ruh kala thoh sha u myntri rangbah duh barim jong ka Ri India u Dr Manmohan Singh ban shah ia ki Hindu na Pakistan ban wan sha India, u tei u nongialam jong ka UDP u buh ka jingkylli ba kumno ka Congress ka kam ba ki pyrshah ia ka Citizenship (Amendment) Bill.
U Bah Alantry u la ong “ ba kane kam dei ba u shu kynnoh ma nga, hynrei ia kine jingthoh jong ki nongialam ka seng congress na Assam bad Pynjab la thoh ha ki kot khubor”. Na ka liang jong u nongialam jong ka UDP u la ong ba “ ki nongialam Congress kila ialam bakla ia ki paidbah”. Ong u Bah Alantry Dkhar.
