Shillong, Nohprah 05: U Myntri rangbah ka jylla u Dr Mukul Sangma u la ong mynta ka sngi ba kawei ka long kmie kala ioh lai tylli ki lut ar hajar kiba dei ki pisa thok, hynrei u la kyntait pat ban iathuh ia ka kyrteng jong kane ka long kmie, u myntri rangbah u la kam ba kane ka long kmie kala wan ban pyni ha u.
Haba kren halor kane ka jingweng noh jong ka sorkar u Modi ia ka lut san spah bad ka lut shihajar kala buh ia ki paidbah ha ka jingeh kaba khraw bad kane kan ialam sha ka jingbam sap kaba kham sherkhi shuh shuh ha kine ki sngi kiban dang wan.
U la ongba ka jingthmu ka long kaba bha hynrei ka jingleh pat kam long kaba biang, u la ong “peit na ki jingkren jong ki iing bishar baroh naduh ki High Court haduh ka jingkren jong ka Supreme Court”. U la ong ba haduh mynta ki mynsiem kiba la duh ei ia la ka jong ka jingimna kane ka daw kila kot sha ka 80 ngut.
Ha ka juh ka por u la ong ba bun na ki paidbah ha kane ka Ri India kim pat nang ban pyndon kam kine ki kot ki bor kiba katkum kane ka juk kaba mynta bad wat tang ki bank ruh kim pat don lut ha man ki jaka kane ruh ka long ka jingeh ia ki paidbah ha ki nongkyndong ia ka pisa jong ki kin buh shaei bad kaba kham eh shuh shuh kan long ia ka Income Tax Department aiu kan leh da la kut kane ka por.
U la ong ba ka mashim kan nym tip u riewlum ne u bym dei riewlum ynda la dei ka por kin sa ai notice ia baroh ha kaba baroh ki briew ki hap ban leit sha Income Tax ban jubab ia kane ka kam kane ka buh ia ki paidbah ha ka jingeh kaba khraw.
