Guwahati, Naitung 06: Ki jylla ka thain shateilammihngi ki la kiewshaphrang ha kaba iadei bad ka ‘JalJeevan Mission’. Ka jylla kum ka Assam kaba la sdang da 1% ka kam mynta ka la kot sha ka 54% ka jingkiew ka kam hapoh ka Jal Jeevan Mission.
Ia kane la pyntip da u Myntri Sorkar Pdeng ba dei khmih ia ka Tnat Jal Shakti, u Gajendra Singh Shekhawatha nongbah Guwahati mynta ka sngi ha ka jingiakren bad ki lad pathai khubor.
U Myntri Sorkar Pdeng mynta ka sngi u la pyniaid ia ka jingialang peitbniah bad ki Jylla ka thain shateilammihngi halor ka jingiaid shaphrang ka JJM bad ka SBM (G) ban pynsted ka jingpyntreikam ia ki artylli kine ki skhim ba kyrpang ha ki jylla ka thain shateilammihngi.
Ki Myntri jong ki Jylla ba dei khmih ia ka Tnat PHE bad ki heh ophisar jong kiwei ki jylla ki la iadonlang ha kane ka jingialang. U Secretary DDWS, AS&MD (NJJM), JS&MD (SBM) bad kiwei kiwei ki heh ophisar na ka Tnat sorkarpdeng ruh ki la iadonlang ha kane ka jingialang.
Ha ka jingiakren bad ki lad pathai khubor, u la iaroh ia ki sienjam jong u Myntri Rangbah ka jylla Assam, uba la peit bniah na ka por sha ka por halor ka jingiaid shakhmat ka kam bad u Myntri ba dei khmih ia ka tnat Public Health Engineering Department (PHED) jong ka Jylla Assam, u JayantaMallaBaruah na ka bynta kane ka jingiaid shaphrang ka projek JalJeevan Mission ha Assam.
U kyrmen ruh ba ka Assam kan kot sha ka thong ha u 2024. U la ong – laitna Assam, baroh ki jylla ka thain shateilammihngi kin kot 100% sha ka thong jong ka JalJeevan Mission ha ka 26 tarik Kyllalyngkot 2024.
Ha ka jingai jingkren ha ka jingialang u la ong, “Ngi tip ba ka swachhta bad ka umdihkilong ki bynta ba kongsan jong ka jingsuk ka rukom im jong ki briew bad ka jingpynkhlain ia ka Gramin Bharat.
Katba u Myntri Rangbah duh, u Narendra Modi u la kut jingmut ha u snem 2014 na Red Fort ba ki san snem ban wan yn pynbna ia ka India kum ‘ka ri kaba la lait na ka jingleit shabar pathar’, ia kaba ngi la kot sha kane ka thong mynta, bad mynta la shim kum ka sienjam sha ka jingkhuidjingsuba ba pura. Mynta ki shnong ki iaidshaphrang ban sdang ia ka rukom pynkhuid ia ki jaboh, ki niut organic, ki jabohplastik bad ruh ka jingpynkhuid ia ki jaboh na ki masi.
U la pyntip ba – naduh 2019, 40% ki shnong ha ka ri jong ngi ki la ioh ia ka kyrdan ODF. Shuh shuh, ka Sikkim mynta ka la long ka jylla kaba la long ODF pura. Kum kane ka jingkiew shaphrang jong ka swachhta ka la kyntiew shikatdeiia ka rukom im jong ki briew ha ki jaka nongkyndong.
Mynshuwa, 62% ki nongshong shnong kim don ia ki lad leit shabar kiba biang, mynta 100% ki briew jong ka ri ki don ki painkhana, la ka long ha iing ne ki painkhana ha ki shnong ki thaw. Ha kaba iadei bad ka jingioh um bad ka umdih kaba shngain, ka India ka la kot 64% ka jingkiew shaphrang ka kam, u la pyntip.
Ka jingialang ka la sdang da ka jingkren pdiang sngewbha na u Myntri ba dei khmih ia ka Tnat PHE jong ka Assam, u JayantaMallaBaruah, bud pat sa ka jingbuh ia ka agenda na ka Secretary Drinking Water and Sanitation ka ViniMahajan kaba la ai jingtip shaphang ka jinglong jingman jong ka mission bad ka jingpyntreikam ia ki kam ha ki Jylla bapher bapher.
Ka la ban jur halor ka jingdonkam ban ai baroh ki tender, ka jinglong ka jingpyntreikam, ka jingpyllait pisa, ka polisi ba iadei bad ka jingpyntreikam bad pynbha, ka jingaiti ia ki kam sha ki nongshong shnong, ka jingkyntiew ia ki sap treikam, ka jingiaineh ka tyllong bad kiwei kiwei ki bynta ba kongsan jong ki mission.
Lah ban kdew ba ka jingialang peitbniah ba khatduh ka la long ha ka 1 tarik Jymmang 2023 ha nongbah Guwahati. Ki Myntri jong ki Sorkar Jylla ki la batai shaphang ka jingiaid shaphrang ka JJM bad SBM. U Shekhawat u la pynpaw ka jingsngewhun halor ka jingtreikam naduh ka jingialang ba khatduh
Ha ka jingai khublei ia baroh ki Myntri jong ki Jylla bad ki ophisar na ka bynta ka jingiashim bynta shitrhem jong ki ha kane ka jingialang, u Myntri Sorkar Pdeng ba dei khmih ia ka Tnat Jal Shakti u la iaroh ia ki jingshimkhia jong ki kumjuh ruh ia ki jingai jingmut ban kham pynbha shuh shuh ia ka jingpyntreikam ia ki mission ryngkat ka jingpynthikna ia ka jingbha jong ki kam.
Da kaba kdew shaphang ki sienjam bapher bapher jong ka Sorkar India kiba la wanrah jingkylla bad kyntiew ia ka jingim jong ki briew khamtam kiba duk ba suk, da kaba pynthikna ba ym don kiba shah iehdien, u la ban jur ia ka jingdonkam jong ka JalJeevan Mission bad ka Swachh Bharat Mission.
U Shekhawat u la ong ba ka jingiashim bynta lang ki briew bad ka jingpynkupbor kadei ka phangpdeng jong ka mission ka ban ialam sha ka jingjop jong ka. Kumta, ki Jylla kidei ban shim baroh ki sienjam ban kynthup lang ia ki briew ha ki shnong ki thaw ha ki kam jong ka mission.
U Shekhawat u la kyrpad ia baroh ki heh ophisar ban ai jingtip shaphang ka jinglong jong ki kam da kaba pynthikna ka jingleitjurip man ka por bad shim ia ki sienjam kiba dei. U la pynthikna ba kan nym don ka jingduna ka jingbei tyngka na ka Sorkar India bad kan ai baroh ki jingiarap ban pynthikna ba ki Jylla kin long ‘HarGharJal’ ha ka por bad ha ka rukom kaba sted.
