Shillong, Kyllalyngkot 30: U bah Hamlet Dohling myntri ba dei peit ia ki kam pynroi sor jong ka sorkar Meghalaya mynta ka sngi u la wan ban ia shim bynta ha ka jingialang paidbah bala pynbeit da ka NESO ha Motphran ban pynpaw ia ka jingpyrshah ia ka Citizenship (Amendment) Bill 2016 jong ka sorkar pdeng kaba la wan rah da ka BJP.
Ha ka jingkren jong u bah Hamlet Dohling, u la ong ba ka jingwan jong sha kane ka jingialang paidbah ka long ba u buh ia ka shuki sha dien bad ka jaidbynriew sha khmat, u la ther ha kane ka jingialang ba ia kane ka bill kaba la wanrah da ka BJP ka dei kaba la saindur bha da ka seng BJP.
U bah Hamlet u la ong ba dei tang ka sorkar MDA jong ka sorkar jylla Meghalaya hapoh ka jingialam jong u Cornad K Sangma kaba la shim ia ka rai hapoh jong ka kabinet ban pyrshah ia kane ka Bill, ym tang kata kala leit ban ia kynduh ruh ia u myntri kampoh iing ka sorkar pdeng bad ong ba ka sorkar Meghalaya kala pyrshah ia ka CAB 2016.
Kane ka jingleh jong ka sorkar u Modi ka long pyrshah ia ki paidbah ka dong shatei lam mih ngi jong ka Ri India, ha ka juh ka por u la kyntu ia ki paidbah ba kin long kiba jai jai namar ka sorkar kala shim khia ia kane ka bynta ban pyrshah ia ka CAB bad u kyntu ban duwai namar ia kaei kaba u briew um lah ai u blei un sngap ia ka jingud jingnam jong ki paidbah.
Ha ka jingkren jong u Bah Lambor Malangniang u la ong ba kum ki nongmih khmat paidbah kin tur na khmat bad ki paidbah kin wan na dien, ia ki la jied ban long ki nongialam da u paidbah bad ai kin tur ban pyrshah ia kane ka CAB. U la iathuh ba ha ka sngi ba ki ia kynduh ia u myntri kam poh iing ka sorkar pdeng ki long “Sangeh ia kane ka Bill CAB”.
Ha kane ka jingialang paidbah u myntri rangbah ka Bihar u la ai da ka jingthoh sha u myntri rangbah ka jylla Meghalaya ba ka party JDU ka don ban kyrshan ia kane ka kynhun ban pyrshah ia ka CAB. Na ka liang jong ki nongialam ka NE mynta kin leit sha baroh ki jylla kiba don ia ki MP ha Rajya Sabha ban kyntu ia ia ki ba kin pyrshah ia kane ka Bill hapoh parliament.
