Shillong, Jymmang 01: Mynta ka sngi da saw tyngap ka bneng ki briew ki runar kiba ym lah ban tip kila leit ban kawang petrol bom ia ka Sardar Police Station, ia ka Rynjah Police Station bad ia ka ophis jong ka Meghalaya Government Construction Corporation (MGCC) ha kane ka jingjia kam shymdon kano kano ka jingjulor.
Ka thymmei khubor ki iathuh ba ha Sardar Police Station ki runar kila kawang petrol bom ha khyrdop bad la hap ha madan bad kum juh ha Rynjah Police Station ruh, hynrei kam shym don kano kano ka jingjulor.
Katba ha ophis jong ka MGCC kaba don ha Bishanapur Laban ka jingkawang petrol kala dei ha ka jingkhang iit bad hap sha madan bad kam shym la don ka jingjulor lait noh ka jingpaid jong ka iit bad kiba ap ha katei ka jaka kila ioh sngew bad mih sha bar ban peit ia kaei kaba jia.
Na ka liang jong ki pulit kila register ejahar pyrshah ia ki runar halor kane ka jingkawang petrol bom ia ka Sardar Police Station, ia ka Rynjah Police Station bad ia ka MGCC ophis bad ka jingtohkit kala sdang ban lap ia ki riew runar ban pynshitom katkum ka ain.
